ՀՀ Սփիւռքի Նախարար Հրանոյշ Յակոբեան Պարգեւատրած Է Լիբանանահայ Խումբ Մը Գործիչներու

Դեկտեմբեր 12-ին Լիբանանի մէջ ՀՀ դեսպանատան մէջ տեղի ունեցաւ Հայաստանի Հանրապետութեան կողմէ ներկայացուած լուսանկարներու ցուցահանդէս`  նուիրուած Հայաստանի անկախութեան 25-րդ տարեդարձին: Այս առիթով աշխատանքային այցով Լիբանանի մէջ գտնուող Սփիւռքի նախարար Հրանոյշ Յակոբեան պարգեւներ, մետալներ ու 2015 թուականի Համահայկական մրցանակաբաշխութեան մրցանակներ յանձնեց լիբանանահայ խումբ մը գործիչներու:

Ողջունելով ներկաները` ՀՀ սփիւռքի նախարար Հրանոյշ Յակոբեան շնորհաւորեց բոլորը ազատ ու անկախ Հայաստանի 25-ամեակին, ինչպէս նաեւ Լեռնային Ղարաբաղի Հանրապետութեան հռչակման 25-ամեակի պանծալի տարեդարձին առիթով:

«Անցնող 100-ամեակի մեծագոյն ու շօշափելի արդիւնքը Հայաստանի եւ Ղարաբաղի հանրապետութիւնների գոյութիւնն է»,-ըսած է Հրանոյշ Յակոբեան` ընդգծելով, որ Անկախութեան տարիներուն ունեցած Հայաստանի Հանրապետութեան 14 հերոսի կոչում ստացածներէն 3-ը սփիւռքահայ են` Ալէք Մանուկեան, Շարլ Ազնաւուր եւ Քըրք Քրքորեան:

Նախարար Յակոբեան իր խօսքի աւարտին բարձր գնահատած է Լիբանանի հայ համայնքի դերն ու կատարած ազգանուէր աշխատանքը` նշելով, որ  լիբանանահայ գաղութը  ամէնէն աշխոյժ, կայտառ, հայասէր, հայաբոյր գաղութներէն մէկն է: Սփիւռքի նախարարն իր խորին շնորհակալութիւնը յայտնած է յանուն հայութեան, յանուն Հայաստանի եւ հայապահպանութեան, հայ ժողովուրդի զաւակներուն բերած նպաստին ու աջակցութեան համար:

Լիբանանահայ գործարար, բարերար Թորոս Սիրանոսեանին Հրանոյշ Յակոբեան պարգեւատրեց Սփիւռքի նախարարութեան «Ուիլեամ Սարոյեան» մետալով: «Կեանքիս մէջ շատ պարգեւներ ու շքանշաններ ստացած եմ երկիրներու նախագահներէ, բարձրաստիճան անձնաւորութիւններէ, բայց այս պարգեւը ինծի համար մեծագոյն ու կարեւոր պարգեւն է,  որ կը ստանամ  կեանքիս մէջ: Որքան որ հպարտ եմ իմ լիբանանեան քաղաքացիութեամբ, նոյնքան եւ աւելի հպարտ եմ, որ ազգութեամբ հայ եմ»,-իր շնորհակալական խօսքին մէջ ըսած  է Թորոս Սիրանոսեան:

Ըստ «Հայերն այսօր»-ի` «Մայրենիի դեսպան» մետալով պարգրատրուեցան ազգային «Աքսոր Գասարճեան» վարժարանի տնօրէն Արեգնազ Աղասարգիսեան, ազգային «Նուպարեան-Խրիմեան» վարժարանի տնօրէն Վաչէ Հարմանտայեան, Համազգայինի ճեմարանի եւ ազգային «Աբգարեան» վարժարանի երկարամեայ ուսուցչուհի Մարալ Խտրլարեան, Հայ կաթողիկէ «Արբոց Հռիփսիմեանց» բարձրագոյն վարժարանի ուսուցչուհի Զապէլ Քէոշկերեան-Ֆերմանեան, Հայ կաթողիկէ «Սուրբ Խաչ-Հարպոյեան» վարժարանի լրատուական բաժնի պատասխանատու, ուսուցչուհի, «Թռիչք» պարբերաթերթի խմբագիր Լիւսի Տէոքմեճեան, «Շամլեան Թաթիկեան» վարժարանի երկարամեայ ուսուցչուհի Սօսի Ապուհանեան, Մանկավարժական գործի երկարամեայ մշակ, լրագրող, խմբագիր Ռոզէթ Ալեմեան եւ լրագրող, հրապարակախօս Պարոյր Աղպաշեան:

«Երախտագիտութեան» մետալով պարգեւատրուեցան Հայ կաթողիկէ «Մեսրոպեան» բարձրագոյն վարժարանի երկարամեայ մանկավարժ, կրթութեան գործի կազմակերպիչ Մարիա Ապունայան-Պէոճեքեան, Հայ աւետարանական քոլեջի մանկավարժ Յասմիկ Թորոսեան, ՀԲԸՄ «Պօղոս Գ. Կարմիրեան» վարժարանի արաբերէնի ուսուցիչ Նորայր Պաղտասարեան, 1964 թուականին հիմնադրուած Պուրճ Համուտի մէջ  միակ երկրորդական «Ազգային Լեւոն եւ Սոֆիա Յակոբեան» վարժարանը: ՀՀ սփիւռքի նախարարութեան «Պօղոս Նուպար» մետալով պարգեւատրուեցաւ ազգային, հասարակական գործիչ, «Աֆհիլ» (Armenian Fund for Health Insurance in Lebanon) հիմնադրամի տնօրէն Յակոբ Լատոյեան: Հայապահպանութեան գործին մէջ ունեցած նշանակալի աւանդի համար Համահայկական մրցանակաբաշխութիւն-2015-ի արդիւնքներով` Գալպագեան ընտանիքը պարգեւատրուեցաւ` իբրեւ  լաւագոյն ընտանիք:

Սփիւռքի նախարարը շնորհաւորեց բոլոր պարգեւատրուածները` մաղթելով ամենայն բարիք:

1 2

Լուսանկարները՝ «Ազդակ»-ի:

 

Scroll Up