Հովանաւորութեամբ Իրաքի հայոց թեմի առաջնորդ` գեշաշնորհ Տ. Աւագ արք. Ասատուրեանի, Պաղտատի մէջ Սեպտեմբեր 29-30 եւ Հոկտեմբեր 1-ին, տեղի ունեցաւ ՀՄԸՄ-ի 34-րդ շրջանի մարզահանդէսը, որ նուիրուած էր Հայաստանի եւ Արցախի անկախութեան  25-րդ ամեակին: Այս մասին «Հայերն այսօր»-ին կը տեղեկացնէ Պաղտատէն Գայեանէ Սահակեան:

Բացման արարողութեան տեղի ունեցաւ Իրաքի եւ ՀՀ դրօշներու բարձրացում, որմէ ետք Տէրունական աղօթքով ազդարարուեցաւ ձեռնարկի բացումը:

Բացման արարողութեան ներկայ էին, Իրաքի մէջ ՀՀ արտակարգ եւ լիազօր դեսպան տիար Կարէն Գրիգորեան եւ դեսպանութեան կցորդ տիար Սմբատ խաչատուրեան, Իրաքի Քրիստոնէից աւանդապահութեան ընդհանուր տնօրէնը, հոգեւոր հայրեր, շրջաններու թաղական խորհուրդներու ներկայացուցիչներ եւ այլ հիւրեր ու ներկաներ:

Մարզահանդէսի ծրագիրը կ’ընդգրկէր Սկաուտական տողանցք, սկաուտական խաղեր, երգեր ու արտասանութիւններ. Երկրորդ օրը, տեղի ունեցաւ մարզական խաղեր` Պաղտատի եւ Իրաքի հայաշատ շրջաններէն ժամանած մարզիկներուն միջեւ:

Երրորդ օրը տեղի ունեցաւ նուէրներու բաշխում, այնուհետեւ տարեկան մարզահանդէսի փակումը կատարուեցաւ խրախճաքով: