ՀՀ Սփիւռքի Նախարարը Ընդունեց Ֆրանսահայ Բարերար Ռայմոն Եզեկելեանը

Հոկտեմբեր 7-ին ՀՀ սփիւռքի նախարար Հրանոյշ Յակոբեան ընդունեց իրաւական մասնագիտութիւններու Հայ-ֆրանսական ընկերակցութեան համանախագահ, ֆրանսահայ բարերար Ռայմոն Եզեկելեանը, որուն աջակցութեամբ  շարք մը  հայանպաստ ձեռնարկներ իրականացուած են ինչպէս Ֆրանսայի, այնպէս ալ Հայաստանի մէջ:

Նախարարը բարձր գնահատեց Եզեկելեանի հայրենանուէր աշխատանքները, նախարարութեան ծրագիրներուն աջակցելու  անոր պատրաստակամութիւնը եւ ներկայացուց այն ձեռնարկները, որոնք ուղղուած են համազգային խնդիրներու լուծման: Հրանոյշ Յակոբեան Ռայմոն Եզեկելեանին հանգամանալից ներկայացուց նաեւ «Հայերու վիճակը աշխարհի մէջ» տարեկան զեկոյցը, այնտեղ արծարծուած խնդիրները, հայկական սփիւռքի ընդհանուր պատկերը, յառաջիկայ ընելիքները:

Հիւրը մեծ գոհունակութիւն յայտնեց Սփիւռքի նախարարութեան հայապահանութեան միտուած ծրագիրներուն վերաբերեալ:

Զրոյցին ընթացքին քննարկուեցան նախարարութեան յառաջիկայ ծրագիրներուն սփիւռքի համայնքներուն առաւել աշխոյժ ներգրաւուածութեան հետ կապուած հարցեր: Նախարարը կարեւոր նկատեց, մասնաւորապէս Հոկտեմբեր 20-24 նախարարութեան նախաձեռնութեամբ իրկանացուելիք լրագրողներու համահայկական 8-րդ համաժողովին` սփիւռքեան լրատուամիջոցներու ղեկավարներու եւ ներկայացուցիչներու, ինչպէս նաեւ օտար լրատուամիջոցներուն մէջ աշխատող   ազգութեամբ հայ լրագրողներու մասնակցութիւնը:

Քննարկուեցան Հայաստան-Սփիւռք գործակցութեան զարգացման առնչուող այլ հարցեր:

Scroll Up