Սեպտեմբեր 29-ին Վայոց ձորի մարզին մէջ  հիւրընկալուած էր «Որդեգրիր  գիւղ մը» նախագիծի հեղինակ,  Աւստրալիոյ եւ Նոր Զելանտիոյ քաղաքացի Լեն Ուիքսը: Վերջինիս հեղինակած նախագիծը ուղղուած է Հայաստանի գիւղական վայրերուն եւ Հայկական սփիւռքի միջեւ կապի, համագործակցութեան հաստատման ու ամրապնդման:

«Հայերն այսօր»-ի փոխանցմամբ` նախագիծի ծիրէն ներս  առաջին կանգառը Ռինդ համայնքին մէջ էր, ուր կազմակերպուած էր տօնական իւրատեսակ ձեռնարկ: Ներկայ էին Վայոց ձորի մարզպետի տեղակալ Մելս Յարութիւնեան, Ռինդի համայնքապետ Յուսիկ Սահակեան, Ելփին, Չիւա, Արենի համայնքներու ղեկավարները, բազմաթիւ վայոցձորցիներ, զբօսաշրջիկներ, ԶԼՄ-ներու ներկայացուցիչներ:

Ռինդ եւ Չիւա համայնքներ տանող ճամբաբաժանին մօտ տեղադրուեցաւ «Կարաս» քարակերտ կոթողը, որ կը ներկայացնէ 7 տարբեր չափերու կարասներ` որոնք իրար միացուած են խաղողի ողկոյզի տեսքով: Արարողութեան ժամանակ բացուեցաւ նաեւ Մուշեղ Գասպարեանի հեղինակած 125 մեթր երկարութեամբ Եռագոյնը:

Այնուհետեւ տեղի ունեցաւ Ռինդ համայնքի մանկապարտէզի խաղահրապարակի բացման արարողութիւնը: Ռինդի մէջ ձեռնարկներու շարքը եզրափակուեցաւ գիւղի դպրոցի բակին մէջ կազմակերպուած ծառատունկով:

«Որդեգրիր  գիւղ մը» ծրագիրի ծիրէն ներս ձեռնարկներ իրականացուեցան նաեւ Արենի եւ Շատին համայնքներուն մէջ: Արենի գիւղի մուտքին մօտ տեղադրուեցաւ համայնքի տեսարժան վայրերը ներկայացնող քարտէզ, որ զբօսաշրջիկներուն համար պիտի ծառայէ որպէս ուղեցոյց: Արենիի միջնակարգ դպրոցին տրամադրուեցան անգլերէնի դասագիրքեր, որմէ ետք գիւղին մէջ կազմակերպուեցաւ ծառատունկ: Արենի համայնքին ղեկավար Սերեոժա Սուքիասեան շնորհակալութիւն յայտնեց աջակցութեան համար եւ յոյս յայտնեց, որ համագործակցութիւնը շարունակական կ’ըլլայ:

Աւելցնենք, որ «Որդեգրիր  գիւղ մը» ծրագիրի հեղինակ Լէն Ուիքս նաեւ  «Ծագումը: Բացայայտում» վէպը հեղինակած է, որ գրելու շարժառիթ  հանդիսացած է իր հայ կնոջ հայկական արմատներն ու հայ ժողովուրդի պատմութիւնը: Գիրքը բաղկացած է երեք մասէ` «Առանցքի երկիրներու վերելքը», «Ազատ աշխարհի պաշտպանութիւնը» եւ «Մարդկային էութեան բացայայտումը»:

«Ծագումը: Բացայայտում» վէպի իրադարձութիւնները կը ծաւալուին համաշխարհային պատմութեան մեծագոյն հակամարտութեան ժամանակաշրջանին: Այն կը սկսի 1930 թ-ին` խորհրդային ժամանակաշրջանին, Հայաստանի Արենի գիւղին մէջ կեանքի մարտահրաւէրներու ուսումնասիրութիւնով:

Հիմնական կերպարները աշխարհի տարբեր երկիրներէ են, իրադարձութիւնները աշխարհագրական  վայրէ մը կը տեղափոխուին դէպի միւսը,  մինչդեռ աւելի ուշ վէպին մէջ անոնք կը սկսին հանդիպիլ զիրար: Տարբեր վայրերու ընտրութեամբ կը նախատեսուի ընթերցողին փոխանցել ուղերձ մը, ըստ որուն` լաւագոյն արդիւնքներու հասնելու նպատակով աշխարհի բոլոր մարդիկ պէտք է համագործակցին իրար հետ: Այն թոյլ կու տայ նաեւ պատկերացում կազմել զանազան հետաքրքիր մշակոյթներու մասին: