Շաբաթ, Օգոստոս 6ին, հովանաւորութեամբ եւ ներկայութեամբ Արեւմտեան թեմի առաջնորդ Մուշեղ արք. Մարտիրոսեանի, տեղի ունեցաւ Քալիֆորնիոյ Հայ երիտասարդաց միութեան հիմնադրութեան 25ամեակի հանդիսութիւնը՝ կազմակերպութեամբ միութեան գրական յանձնախումբին, Կլենտէյլի Երիցական եկեղեցւոյ մէջ: Բանախօսն էր ազգային գործիչ եւ դաստիարակ, իրաւաբան Սեդօ Պոյաճեան, իսկ յայտագիրը յագեցած էր գեղարուեստական ծրագիրով, երգով եւ ասմունքով, մասնակցութեամբ միութեան «Կոմիտաս» երգչախումբին եւ մանուկներու պարախումբին:

Իր պատգամին մէջ, առաջնորդը շնորհաւորեց միութեան հիմնադրութեան 25ամեակը, ապա նշեց, որ Քալիֆորնիոյ Հայ երիտասարդաց միութեան 25 տարիներու երթը եղաւ այնքա՛ն բեղուն, որ միութիւնը ունեցաւ իր սեփական կեդրոնը, պարբերաթերթը, օրաթերթը, երգչախում-բն ու պարախումբը: Առաջնորդ սրբազանը, մէջբերելով միութեան հիմնի բառերը՝ նշեց, որ իսկապէ՛ս Քալիֆորնիոյ Հայ երիտասարդաց միութիւնը, որ հիմնադրուած է իրաքահայերու ջանքերով, «Հայ մանուկին համար եղաւ վահան, երիտասարդին համար՝ հաւատք եւ քաջութիւն»։ Ան յատուկ կերպով գնահատեց պատուական եւ պատ-մական իրաքահայերը, որոնք մնայուն կերպով զօրավիգ եւ սատար կանգնած են եւ գործօն մասնակցութիւն ունեցած Ազգ. առաջնորդարանի առաքելութեան:

Այս մասին կը յայտնէ Ասպարէզ: