«Իմ Հայաստան» Համահայկական Փառատօնին Մասնակից Երգչախումբերու Ղեկավարներն Ու Ներկայացուցիչները Հիւրընկալուեցան ՀՀ Սփիւռքի Նախարարութեան ՄԷջ

Օգոստոս 5-ին ՀՀ սփիւռքի նախարարի տեղակալ Սերժիկ Սրապիոնեան հանդիպեցաւ «Իմ Հայաստան» համահայկական 3-րդ փառատօնի երգչախմբային արուեստի օրերուն մասնակցելու նպատակով Սփիւռքէն ժամանած երգչախումբերու ղեկավարներու, ներկայացուցիչներու եւ անհատ կատարողներու հետ:

ՀՀ սփիւռքի նախարար Հրանոյշ Յակոբեանի անունէն ողջունելով փառատօնի մասնակիցները` Ս.Սրապիոնեան նշեց. «Շնորհակալ ենք, որ ընդունեցիք մեր հրաւէրը եւ այսօր մասնակցում էք փառատօնին: Համայնքներում կատարած ձեր հայապահպան գործունէութիւնն արժանի է ամենամեծ դրուատանքին: Երգը ժողովրդի սրտի խօսքն է: Մեր երգը ներկայացնելով օտար երկրներում` դուք ոչ միայն նպաստում էք մատաղ սերնդի հայեցի դաստիարակութեանը, այլեւ հայ երգը դուրս էք բերում միջազգային հարթակներ, բեմեր: Իսկ Հայրենիքում ձեր ելոյթները իւրովի հաշուետուութիւններ են` կատարած եւ կատարուող աշխատանքների մասին»:

Եգիպտոսի «Արաքս» երգչախումբի խմբավար Միհրան Ղազելեան նշեց, որ նախորդ փառատօնին իրենց մասնակցութիւնը աննախադէպ ոգեւորութիւն յառաջացուցած էր մասնակիցներուն մօտ, որուն արդիւնքով մասնակցելով Գահիրէի մէջ իրականացուող երգի մրցոյթներուն, «Արաքս»-ը յաջողած է գրաւել պատուաւոր մրցանակային տեղեր: «Բացի այդ, Արցախի ապրիլեան պատերազմի ժամանակ երգչախումբի անդամներն ու անոնց մտերիմները դրամահաւաք կազմակերպեցին եւ գումարը փոխանցեցին զոհուածներու ընտանիքներուն», – աւելցուց ան:

Նշենք, որ «Իմ Հայաստան» համահայ­կական 3-րդ փառատօնը կ’իրականացուի Հայաստանի Հանրապետութեան Նախագահի բարձր հովանիի ներքոյ: Երգչախմբային արուեստի օրերու հանդիսաւոր բացումը տեղի կ’ունենայ Օգոստոս 5-ին, ժ.19:00-ին Արամ Խաչատրեանի անուան մեծ համերգասրահին մէջ:

1 2

Scroll Up