Վեհափառը Համերգէն Առաջ Իր Օրհնութիւնը Փոխանցած է Ռուսահայոց Թեմի Պարային Համոյթներուն

Յուլիս 25-ին ՆՍՕՏՏ Գարեգին Բ Ամենայն Հայոց Կաթողիկոսը Մայր Աթոռ Սուրբ Էջմիածինի  մէջ իր օրհնութիւնը փոխանցեց ՀԱԵ Ռուսաստանի եւ Նոր Նախիջեւանի հայոց թեմի` Մոսկուայի`  «Հայասա», «Վարդավառ», Ս. Փեթերսպուրկի` «Նայիրի» եւ Տոնի Ռոստովի «Զուարթնոց» համոյթներու պարողներուն: Անոնց կ’ուղեկցէին թեմի հոգեւոր հայրերն ու համոյթներու ղեկավարները: Այս մասին «Հայերն այսօր»-ին կը յայտնեն Մոսկուայի «Հայորդաց տան» տեղեկատուական կեդրոնէն:

Վեհափառը համոյթները շնորհաւորեց «Իմ Հայաստան» համահայկական փառատօնին փայլուն ելոյթներու կապակցութեամբ եւ հետաքրքրուեցաւ, թէ ինչ կը ցանկային ստանալ իրմէ: Պարողները ցանկացան ճանաչողական շրջայց կատարել Էջմիածին քաղաքին մէջ․ Վեհափառի օրհնութեամբ անոնց ցանկութիւնը յառաջիկային կեանքի կը կոչուի:

Ամենայն Հայոց Հայրապետի հետ հանդիպումէն յետոյ` Էջմիածինի «Հրաչ եւ Սիւզան Թուֆայեան» հայորդաց տան մէջ համոյթները ներկայացան համերգային ծրագիրով: Ներկայացնելով պարային համոյթները` հայորդաց տուներու հոգեւոր տեսուչ Հայր Կոմիտաս վարդապետ Յովնանեան ըսաւ․«Հայ եկեղեցին ամէնուր ազգապահպանման խարիսխն է: Ինչքան էլ փորձեն եկեղեցին կոտրել կամ ոչ իրական պատկերով ներկայացնեն` ճշմարտութիւնը մէկն է, որտեղ առկայ է հայ

եկեղեցին, այնտեղ հայութիւնը պահպանում է իր դիմագիծը»:

Իսկ հայրենիքէն դուրս հայկական դիմագիծի պահպանութեան հետ կապուած` ներկաներու բոլոր կասկածները փարատեցին, երբ բեմ բարձրացան տղաները` խրոխտ եւ աղջիկները` նազանի կեցուածքով:

«Հայասա» պարային համոյթի գեղարուեստական ղեկավար Արփինէ Ամիրեանի, «Վարդավառ»-ի գեղարուեստական  ղեկավար Մարգարիտա Գրիգորեանի, «Զուարթնոց»-ի գեղարուեստական ղեկավար Արմէն Գրիգորեանի, «Նայիրի»-ի գեղարուեստական ղեկավար Զաւէն Վիրապեանի պարողները ներկայացան չորսական իւրօրինակ, բովանդակալից եւ գեղեցկագոյն պարերով:

«Ինչպէս կ’ըսեն` սիրտս փառաւորուեցաւ այս հայորդիներու պարերէն: Ապշիլ կարելի է, թէ ինչ վարպետութեամբ ու ճկունութեամբ կը ներկայացնէին հայկական պարը ու ատիկա այն պարագային, որ հեռու են հայոց հողի ազդեցութենէն: Կ’ուզեմ , որ անոնց` Հայաստան այցելելու բարի ու լուսաւոր առիթները շատ ըլլան, որպէսզի անոնք գոնէ հայրենիքի հետ կապ պահպանելու հնարաւորութիւն ունենան»,- մեզի հետ զրոյցին ըսաւ հանդիսատես Էմմա Տէրտէրեան:

Հանդիսատեսի բուռն-ջերմ ծափողջոյնները եւ մինչեւ վերջին վայրկեանը լեփ-լեցուն դահլիճը կը խօսէին համերգային ծրագիրի հետաքրքրական, սպասուած եւ ստացուած ըլլալուն մասին․ մինչեւ վերջ դահլիճէն չէր հեռանար անգամ ոտքի վրայ մնացած հանդիսատեսը:

Համերգային ծրագիրի աւարտին Տէր Պօղոս աբեղայ Վարդանեան` դիմելով ներկաներուն,ըսաւ․ «Մեզի համար կրկնակի ուրախութիւն է այսօր գտնուիլ այս դահլիճին մէջ, քանի որ հայրենիքէն դուրս կ’ապրինք: Սակայն ատիկա չխանգարեց այս սրահ բերել այն ոգեւորութիւնը, հաւատքը, սէրն ու հզօրագոյն պատմութիւնը, որ մենք ստացած ենք մեր նախնիներէն: Մեր շնորհակալութիւնը համոյթներու ղեկավարներուն, որոնք կրցած են ազգայինի հանդէպ սէր սերմանել պարողներուն մէջ: Ինչպէս Հայր Սուրբը ըսաւ` ես ալ  այն համոզումը ունիմ, որ հայ եկեղեցին`  յատկապէս Սփիւռքի մէջ, խարիսխն է հայապահպանութեան, բայց առաւել եւս այդ խարիսը մեր Սրբութիւն Սրբոց Մայր Աթոռ Սուրբ Էջմիածինն է, ուր մենք այսօր եղանք, գոհութիւն առաքեցինք բարձրեալին, ստացանք Վեհափառ Հայրապետի օրհնութիւնը եւ  մէկ անգամ եւս ամրապնդեցինք այն հաւատքը, որ ուր ալ որ ըլլանք` մենք հայ ժողովուրդի արժանի զաւակներն ենք»:

12 34 56 7

Scroll Up