ՀՀ սփիւռքի նախարարութեան նախաձեռնութեամբ իրականացուող «Իմ Հայաստան» համահայկական փառատօնի ծիրէն ներս Ստեփանակերտի մշակոյթի եւ երիտասարդութեան պալատին մէջ տեղի ունեցաւ Ռուսաստանի Դաշնութեան, Յունաստանի, Իրանի եւ Արցախի պարախումբերու եւ անհատ կատարողներու համատեղ համերգը` նուիրուած ՀՀ անկախութեան 25-ամեակին: Ձեռնարկին ներկայ էին ԼՂՀ մշակոյթի եւ երիտասարդութեան հարցերու նախարար Նարինէ Աղաբալեան, հասարակական, մշակութային գործիչներ, արտերկրէն ժամանած հիւրեր:

Ելոյթ ունեցան Թեհրանի «Զարթօնք» (գեղարուեստական ղեկավար` Լորեթա Աւետիսեան), Յունաստանի «Աւետիս» (գեղարուեստական ղեկավար` Շուշանիկ Սեմերճեան), ՌԴ Ս. Փեթերսպուրկի «Նայիրի» (գեղարուեստական ղեկավար` Զաւէն Վիրապեան), Սոչիի «Լոո» (գեղարուեստական ղեկավար` Ենոք Պատալեան), Մայքոփ քաղաքի «Վարդանանք» եւ «Նայիրի» (գեղարուեստական ղեկավար` Սիւզաննա Պապայեան), եւ Տոնի Ռոստովի «Զուարթնոց» (գեղարուեստական ղեկավար` Արմէն Գրիգորեան) պարախումբերը:

Իրենց կատարումներով փառատօնի մասնակիցներուն եւ ներկաներուն ողջունեցին Ստեփանակերտի պարարուեստի քոլեջի, Յակոբ Գիւրջեանի անուան արուեստի դպրոցի, «Արցախ» ազգագրական եւ Արցախի «Մենք ենք մեր սարերը» երգի-պարի պետական համոյթներու եւ «Արցախի ձայներ» նախագիծի մասնակիցները:

ՀՀ սփիւռքի նախարար Հրանոյշ Յակոբեանի ողջոյնի խօսքը փոխանցեց նախարարութեան ԱՊՀ հայ համայնքներու վարչութեան Միջին եւ Հարաւ-ասիական երկիրներու հայ համայնքներուն հետ կապերու բաժինի պետ Անահիտ Զոհրապեան: Ան շնորհակալութիւն յայտնեց ԼՂՀ մշակոյթի եւ երիտասարդութեան հարցերու նախարար Նարինէ Աղաբալեանին` արցախեան հողին վրայ փառատօնի մասնակիցներուն հիւրընկալելու, ջերմ ընդունելութեան եւ համերգը յաւուր պատշաճի կազմակերպելու համար:

Սփիւռքի նախարարութեան «Իմ Հայաստան» համահայկական փառատօնի գեղարուեստական ղեկավար Էդուարդ Եսայեանց փառատօնին աշխոյժ մասնակցութեան համար Թեհրանի «Զարթօնք» պարախումբի եւ Արցախի պարի պետական  համոյթի կատարողներուն յանձնեց ՀՀ սփիւռքի նախարարութեան հաւաստագիրներ եւ յուշամետալներ: