Օր 4-րդ. «Իմ Հայաստան» Փառատօնի Մասնակիցները Այցելեցին Կոտայքի Մարզ

Յուլիս 25-ին Հայաստանի Հանրապետութեան Անկախութեան 25-ամեակին նուիրուած ՀՀ սփիւռքի նախարարութեան «Իմ Հայաստան» համահայկական 3-րդ փառատօնի «Պարարուեստի օրեր»-ու ծիրէն ներս «Կիլիկիա» (ՌԴ, Մոսկուա), «Տաշիր» (ՌԴ, Գալուկա), «Նարեկ» (ՌԴ, Գրասնոտար), «Տայք» (Էսթոնիա), «Թերփսիխորա» (ՌԴ, Փեաթիկորսկ), «Արփի» (ՌԴ, Ռոսթով) պարախումբերը մեկնեցան Կոտայքի մարզ:

«Հայերն այսօր»-ի փոխանցմամբ` փառատօնի մասնակիցները այցելեցին Գառնիի հեթանոսական տաճար, Գեղարդի վանք:

Երեկոյեան Աբովեան քաղաքի մշակոյթի կեդրոնին մէջ կայացաւ սփիւռքեան պարախումբերու համերգը: Շուրջ երկու ժամ տեւած համերգային ծրագիրը անմոռանալի պահեր պարգեւեց դահլիճին մէջ հաւաքուած հանդիսատեսին:

Համերգին ներկայ էին Կոտայքի մարզպետի տեղակալ Կարէն Մարգարեան, Աբովեանի քաղաքապետ Վահագն Գէորգեան:

Երեկոյի ընթացքին «Իմ Հայաստան» փառատօնի մասնակիցներուն ողջունեցին նաեւ երգիչներ Սամսոն Պանեան, Մամիկոն Բադալեան, Աբովեանի քաղաքապետարանի «Նազէնիկ» պարախումբը (գեղարուեստական ղեկավար` Այտա Մկրտչեան):

Համերգի աւարտին ՀՀ սփիւռքի նախարարութեան  «Իմ  Հայաստան» փառատօնի մշակութային հարցերով պատասխանատու, ՀՀ վաստակաւոր մանկավարժ Լաուրա Աւետիսեան շնորհակալութիւն յայտնեց Կոտայքի մարզպետարանի աշխատակիցներուն, համերգի կազմակերպիչներուն` Սփիւռքէն ժամանած պարախումբերուն հիւրընկալելու համար: «Պարախումբերուն համար մեծ պատիւ է ելոյթ ունենալ հայրենիքի մէջ, հարազատ հանդիսատեսի ջերմ ծափահարութիւններու ներքոյ: Հայրենիքէն ստացած ջերմութիւնն ու անկեղծ վերաբերմունքը մեր պարախումբերուն նոր լիցք կը հաղորդէ, կ’օգնէ առաւել քրտնաջան աշխատիլ` հաւատարիմ մնալով սեփական ակունքներուն, մշակոյթին»,-աւելցուց Լաուրա Աւետիսեան եւ շնորհակալագիրներ յանձնեց Կոտայքի մարզի մասնակիցներուն:

12 3 4 5 6 7 8

Scroll Up