«Օր Մը Անպայման Պիտի Վերադառնամ Այնտեղ, Ուրկէ Սկսած Եմ Իմ Մեծ Ճանապարհի Սկիզբը». Վարդուհի Խաչատրեան

«16 տարի կ’ապրիմ դուրսը, սակայն հոգիով ու սրտով միշտ ներսն եմ` իմ Հայրենիքիս մէջ»

Յուլիս 20-ին ՀՀ սփիւռքի նախարարին կողմէ «Կոմիտաս» մետալով պարգեւատրուած, 7 միջազգային մրցոյթներու դափնեկիր, Ժնեւի «Կրանտ» օփերայի մեներգչուհի Վարդուհի Խաչատրեանի հետ զրուցած է  «Հայերն այսօր»-ի  թղթակիցը:

 

Յարգելի՛  Վարդուհի ,  սրտանց կը շնորհաւորեմ  բարձր պարգեւի արժանանալու առիթով:  Խնդրեմ  ներկայացէք  Ձեր ստեղծագործական անցած ճանապարհի համառօտ  խճանկարը:

-Ծնած եմ Երեւանի մէջ. հայրս ՀՀ ժողովրդական արուեստագէտ Ալբերտ  Խաչատրեանն է: Մեծցած եմ երաժշտական մթնոլորտի մէջ,  երաժշտական բարձրագոյն կրթութիւնս ստացած եմ Երեւանի մէջ:  Եղած եմ ՀՀ  ֆիլհարմոնիայի եւ կամերային նուագախումբի մենակատար, աշխատած եմ նաեւ Հայաստանի ակադեմական երգչախումբին հետ: Առաջին մեծ յաջողութիւնս 1999-ին Լիեժի մէջ  (Պելճիգա) վոկալիստներու մրցոյթին տարած յաղթանակը  եղած է, որուն յետագային յաջորդեցին շատ յաղթանակներ ու մրցանակներ:  Հայաստանի մէջ,  որպէս տարուան լաւագոյն երգչուհի,  2004-ին արժանացած եմ  «Արտաւազդ»  մրցանակի:  Բազմաթիւ հրաւէրներով հանդէս եկած եմ աշխարհի տարբեր բեմերու վրայ`  համագործակցելով հանրայայտ շատ երգիչներու, խմբավարներու եւ երաժիշտներու հետ,  բազմաթիւ մենահամերգներ տուած եմ աշխարհի շատ քաղաքներու մէջ:  Կ’երգեմ 7 լեզուներով:  2007-էն կը  բնակիմ եւ կ’աշխատիմ    Ժնեւի մէջ:

Կոմիտասը  ի՞նչ տեղ կը զբաղեցնէ Ձեր կեանքին մէջ,  ձեր երգացանկին:

-Կոմիտասի երգերուն ու մշակումներուն ծանօթացած եմ դեռեւս մանուկ հասակէս` լսելով հայրիկիս`  ՀՀ ժողովրդական արուեստագէտ Ալբերտ Խաչատրեանի կոմիտասեան անզուգական կատարումները:  Իմ բոլոր մենահամերգներու ծրագիրներուն ընդգրկուած են Կոմիտասի վոկալ ստեղծագործութիւնները,  որոնք ներկայացուցած եմ եւրոպացի հանդիսատեսներուն:  Նարեկացի,  Կոմիտաս,  Եկմալեան, Բաբաջանեան եւ հայ այլ երաժշտահաններու ստեղծագործութիւնները եւս ներկայացուցած եմ միջազգային յայտնի փառատօններու ժամանակ: 2010-ին  լոյս  տեսած է  իմ` «Կոմիտասի յիշատակին» ձայնասկաւառակը, որ կ’ընդգրկէ Կոմիտասի քնարական երգերու շարքը:

Ես լսած եմ ,  որ Ժնեւի մէջ  Դուք ստեղծած էք  «Աւետիս»  հայ- զուիցերական մշակութային կազմակերպութիւնը.  ո՞րն է այդ կազմակերպութեան առաքելութիւնը, նպատակը:

-«Աւետիս»-ի նպատակը եւրոպացի  հանդիսատեսին հայ երաժշտահաններուն եւ երաժիշտ- կատարողներուն հետ ծանօթացնելն է,  հայկական երաժշտութիւնն  ու արուեստը Եւրոպայի մէջ տարածելը եւ Եւրոպայի մէջ ճանաչում ստանալու համար հայ տաղանդաւոր երիտասարդներուն,  արուեստագէտներուն աջակցիլը:  2015-ին «Աւետիս»-ը  Հայոց  ցեղասպանութեան նուիրուած 3  մեծ ձեռնարկ  կազմակերպած է Ժնեւի  հանրայայտ սրահներուն մէջ:

Ին՞չ ծրագիրներ ունիք Հայաստանի մէջ:

-Մասնագիտական առումով` ոչ մէկ. եթէ հրաւիրեն, կու գամ ու կ’երգեմ: Յուլիս 25-ին պիտի մեկնիմ Իտալիա, ուր Օգոստոս 11, 12-ին «Այտա»  օփերային մէջ հանդէս պիտի գամ Ամներիսի դերերգով:

Ին՞չ զգացումներ  ունեցաք,  երբ ՀՀ սփիւռքի նախարարը Ձեզ  «Կոմիտաս» մետալով պարգեւատրեց:

-Շատ  յուզուած էի. ուրախ եմ, որ Հայրենիքի մէջ նման պարգեւի  կ’արժանացնեն զիս: Շատ մրցանակներու  արժանացած եմ, սակայն Կոմիտասի մետալով պարգեւատրուիլը  այնչափ թանկ  ու  զգայացունց  պահ էր ինծի համար:  Ես միշտ կ’երգեմ` առանց որեւէ պարգեւի ակնկալիք ունենալու, սակայն պէտք է  խոստովանիմ,  որ հաճելի է նման վերաբերմունքի,  ուշադրութեան արժանանալը:

Դուք   քանի մը օրէն պիտի մեկնիք . Հայաստանէն ի՞նչ պիտի տանիք  Ձեզ հետ

-Շատ բան` արեւ, ժպիտ, անսահման ջերմութիւն,  նաեւ` անհանգստութիւն…ես կը կարօտնամ  ինծի հարազատ մարդոց,  Երեւանի`  ծանօթ ու բազում յոյզեր, յիշողութիւններ արթնցնող փողոցները, եկեղեցիները…օր մը անպայման պիտի վերադառնամ այնտեղ , ուրկէ սկսած եմ իմ մեծ ճանապարհի  սկիզբը:  16 տարի կ’ապրիմ  դուրսը, սակայն հոգիով ու սրտով միշտ ներսն եմ`  իմ Հայաստանին մէջ:

Զրուցեց  Կարինէ  Աւագեան

Scroll Up