ՀՀ սփիւռքի նախարարութեան «Արի տուն» ծրագիրի 3-րդ փուլի մասնակից  Վարուժան Կակոյեան Սուրիական պատերազմի հետեւանքով Հալէպէն ընտանիքին հետ Հայաստան  տեղափոխուած է Մարտ  ամսուն: Մինչ այդ երբեք չէր եկած Հայրենիք:

 «Հայերն այսօր»-ի հետ զրոյցին Վարուժան ըսաւ, որ շատ  հաւնած է Հայաստանի տեսարժան վայրերը, երեւանեան այգիները, ուր յաճախ ծնողներուն հետ զբօսանքի  դուրս կու գան: Վարուժանին յատկապէս հայկական քարերն ու ժայռերը  գրաւած են, որոնք անոր ուժ, վստահութիւն կը հաղորդեն:

Զրոյցի ընթացքին Վարուժան չթաքցուց, որ շատ կը կարօտնայ Հալէպը, կը կարօտնայ իր ընկերները, բնակարանն ու դպրոցը: Անընդհատ կը յիշէ բակային խաղերն ու ամառնային ճամբարները` յոյսով սպասելով այդ երանելի օրերու «վերադարձը»:

«Արի տուն ծրագիրի մասին արդէն գիտէի, տեղեակ էի նաեւ, որ Հայաստան հաստատուած սուրիահայ երեխաները նոյնպէս մասնակցելու հնարաւորութիւն ունին: Այդ հանգամանքն ալ ինծի ոգեշնչեց մասնակցելու ծրագիրին»,- ըսաւ Վարուժան` աւելցնելով, որ շատ կ’ուզէ սուրիահայ պատանիներուն եւ աղջիկներուն հանդիպիլ այն նպատակով, որ գուցէ անոնց մէջ իր ընկերներուն պիտի կարենայ գտնել: Ան անհամբերութեամբ կը սպասէ Ծաղկաձոր մեկնելուն, որպէսզի «Արի տուն» ճամաբարին մէջ հաճելի ժամանակ անցնէ, հայկական երգն ու պարը  սորվի:

Խօսելով երազանքներուն մասին` Վարուժան ըսաւ, որ կը ցանկայ վիրաբոյժ դառնալ, որպէսզի բուժէ զինք դիմող բոլոր հիւանդները: Նաեւ կը սիրէ երգել, գծագրութեամբ զբաղուիլ եւ ազգականի` Աշոտ Նադանեանի մօտ ճատրակի դասընթացներուն յաճախել:

Գէորգ Չիչեան