Հռոմի Պապի Հետ Մերձաւոր Արեւելքի Խաղաղութեան համար «Աղօթող» Երիտասարդները. Աղօթք Առ Յորդանան

Յունիս 25-ին Հանրապետութեան հրապարակին վրայ Հռոմի Ֆրանչիսկոս Պապի ընդհանրական արարողութեան կը մասնակցին Յորդանան ծնած` Նժդեհ Մուրադեանը եւ Նայիրի Գուլաքսզեանը, որոնք իրենց ծննդավայրէն բերուած բուռ մը հողով կը մասնակցին  ալեկոծեալ տարածաշրջանին մէջ խաղաղութեան հաստատման համար Հռոմի Պապի հնչեցուցած աղօթքին:

Կը ներկայացնենք յորդանանահայ երիտասարդներուն մասին «Հայերն այսօր»-ի փոքրիկ անդրադարձը:

Նժդեհ Մուրադեան

16-ամեայ Նժդեհ Մուրադեանի արմատները Արեւմտեան Հայաստանի Ուրֆա եւ Արաբկիր քաղաքներէն են: Անոր մեծհայրերը Հայոց ցեղասպանութեան վերապրածներէն են, որոնք, փրկուելով թրքական եաթաղանէն, ապաստան գտած են Յորդանանի մէջ:
2014 թուականին ուսումը շարունակելու նպատակով` Նժդեհը Յորդանանէն միայնակ Հայաստան եկած է: Այժմ կ’ուսանի Հայաստանի պետական Ճարտարագիտական համալսարանի 2-րդ դասարանի`  ձաւաւորման բաժինին մէջ:

«Հռոմի Ֆրանչիսկոս պապի հետ հանդիպումը խորհրդանշական կը համարեմ, քանի որ ընտանիքս հաւատացեալ է շատ, յատկապէս` մայրս: Կը կարծեմ` Աստուծոյ նախախնամութեան շնորհիւ  ինծի ընտրած են: Հռոմի պապին բարեւելը արդէն մեծ ձեռքբերում կը համարեմ: Մայրս, հեռուստատեսութեամբ տեսնելով այդ պահը, շատ կ’ուրախանայ եւ կը յուզուի»,-«Հայերն այսօր»- ի հետ զրոյցին ըսաւ Նժդեհ Մուրադեան:

Նայիրի Գուլաքսզեան

Նայիրի Գուլաքսզեան 16 տարեկան է: Ծնած է Յորդանան: արդէն ութ ամիս է, որ ան ընտանիքին հետ տեղափոխուած է Հայաստան ապրելու: Կը յաճախէ Երեւանի Մանուկ Աբեղեանի անուան թիւ 3 աւագ դպրոցը:

Խօսելով Հռոմի պապի հետ հանդիպման, ընդհանրական արարողութեան ու Խաղաղութեան աղօթքին մասնակցելու մասին` Նայիրին ըսաւ, որ բերկրանքի պահեր կ’ապրի, քաջ կը գիտակցի, որ ամէն մէկուն նման բացառիկ հնարաւորութիւն տրուած չէ: Կը կարծէ`Հռոմի Ֆրանչիսկոս Պապի այցելութիւնը մեր պետութեան զարգացում պիտի բերէ, շատ կ’ուզէ, որ Սրբազան Քահանայապետը ի լուր աշխարհի խաղաղութիւն քարոզէ, որպէսզի վերջանան պատերազմներն ու բոլոր ահաբեկչութիւնները: Նայիրին այցելութիւնը կարեւոր կը համարէ անով, որ համայն աշխարհը կ’իրազեկուի Հայաստանի` իբրեւ առաջին քրիստոնեայ պետութիւն ըլլալու փաստին մասին:

«Հայերն այսօր»-ի հետ զրոյցին Նայիրին խօսեցաւ նաեւ իր արմատներուն մասին. «Նախնիներս Այնթապէն են: Անոնք Հայոց ցեղասպանութեան ժամանակ հրաշքով  փրկուած են կոտորածէն` հաստատուելով Հալէպ, որմէ ետք  Յորդանան տեղափոխուած են»:

Scroll Up