Յունիս 25-ին Հանրապետութեան հրապարակին վրայ Հռոմի Ֆրանչիսկոս Պապի ընդհանրական արարողութեան կը մասնակցին Եգիպտոս ծնած, սակայն վերջին տարիներուն Հայաստան տեղափոխուած` Վալենթինա եւ Յակոբ Մազլումեանները, որոնք իրենց ծննդավայրէն բերուած  բուռ մը հողով կը մասնակցին  ալեկոծեալ տարածաշրջանին մէջ խաղաղութեան հաստատման համար Հռոմի Պապի հնչեցուցած աղօթքին:

Կը ներկայացնենք եգիպտոսահայ երիտասարդներուն մասին «Հայերն այսօր»-ի փոքրիկ անդրադարձը:

Վալենթինա եւ Յակոբ Մազլումեանները երկուորեակներ են: Ծնած եւ մեծցած են Եգիպտոսի մէջ:

Եգիպտոսի մէջ հմտանալով գրաֆիքական ձեւաւորողի մասնագիտութեան մէջ` Վալենթինան երեք տարի առաջ Հայաստան  վերադարձած է, որպէսզի Մայր Հայրենիքի մէջ գործունէութիւն ծաւալէ: Այժմ Վալենթինան կը յաճախէ Հենրիկ Իգիթխանեանի անուան Գեղագիտական դաստիարակութեան կեդրոնը:

Յակոբը երաժիշտ է: Հինգ տարի առաջ  վերադարձած է Հայաստան:

Վալեթնինան եւ Յակոբը  Հայաստանի մէջ շատ լաւ կը զգան, ընկերական շրջապատ ստեղծած են, որոնց հետ պարբերաբար շրջայցեր կը կատարեն Հայաստանի տեսարժան վայրերու մէջ` վայելելով չքնաղ բնութիւնն ու մաքուր օդը:
«Հանրապետութեան հրապարակին վրայ Հռոմի պապի հետ հանդիպման արարողութեան մասնակցելու ուրախութիւնը եւ յուզմունքը աննկարագրելի է, մեր հոգիի ապրումները խօսքերով չենք կրնար նկարագրել, անհամբեր կը սպասենք այդ պահուն: Հպարտ ենք, որ եգիպտահայ համայնքը ներկայացնելու պատիւը հէնց մեզի  վստահուած է:

Լիայոյս ենք` այս այցելութեամբ խաղաղութիւն կը հաստատէ Մերձաւոր Արեւելքի երկիրներուն մէջ»,-«Հայերն այսօր»-ի հետ զրոյցին ըսին Վալենթինա եւ Յակոբ Մազլումեանները:

Աւելցնենք, որ Վալենթինայի եւ Յակոբի նախնիները Արեւմտեան Հայաստանի Սամսոն քաղաքէն կը   սերին: