Հռոմի Պապի Հետ Մերձաւոր Արեւելքի Խաղաղութեան Համար «Աղօթող» Պատանիները. Աղօթք Առ Իրաք

Յունիս 25-ին Հանրապետութեան հրապարակին վրայ Հռոմի Ֆրանչիսկոս Պապի ընդհանրական արարողութեան կը մասնակցին Իրաք ծնած, սակայն Հայաստան տեղափոխուած` Արփի Պետրոսեանը եւ Կարին Աւագեանը, որոնք իրենց ծննդավայրէն բերուած  բուռ մը հողով մասնակիցը կը դառնան ալեկոծեալ տարածաշրջանին մէջ խաղաղութեան հաստատման համար Հռոմի Պապի հնչեցուցած աղօթքին:

Կը ներկայացնենք իրաքահայ պատանիներու մասին «Հայերն այսօր»-ի փոքրիկ անդրադարձը:

Արփի Պետրոսեան

Արփի Պետրոսեան ծնած է Իրաքի Պաղտատ քաղաքին մէջ, 18 տարեկան է: Պապերը Ցեղասպանութեան տարիներուն Մշոյ Ախլաթ գաւառի Թեղուտ գիւղէն բռնելով գաղթի ճանապարհը եւ բազում փորձութիւններու միջով անցնելով` հասած են Իրաք: Հաստատուելով այստեղ` չեն կոտրուած ու յուսալքուած,այլ ապրած  են եւ արարած, կազմած ընտանիք, բայց միշտ` հայրենքի կարօտը սրտի մէջ պահած եւ յուսալով, որ օր մը կրկին կը տեսնեն զայն:

2003 թուականը դարձաւ այդքան բաղձալի երազանքի իրագործման տարի: Պետրոսեաններու ընտանիքը տեղափոխուեցաւ Հայաստան: Արփին, ապրելով պատերազմական երկրի մէջ եւ ըլլալով Ցեղասպանութեան վերապրածներու ժառանգ, խաղաղութեան մասին ունեցած պատկերացումներուն մասին «Հայերն այսօր»-ի  հետ զրոյցին հետեւեալը փոխանցեց. «Կը կարծեմ` իւրաքանչիւրս իր մէջ, իր հոգիին մէջ պէտք է փնտրէ խաղաղութիւնը, եթէ բոլորը գտնեն իրենց խաղաղութիւնը, ուրեմն աշխարհի մէջ ալ խաղաղութիւն կը տիրէ. չէ՞ որ մարդկութիւնը  պատասխանատու է այսօր կատարուող աղէտալի իրադարձութիւններուն համար»:

Կարին Աւագեան

Կարին Աւագեան ծնած է Իրաք: Ցեղասպանութեան տարիներուն անոր մօր կողմէն պապերը Վան քաղաքէն գաղթած եւ հասած են Իրաքի Տհոք քաղաքը, այնուհետեւ հաստատուած Պաղտատի մէջ: Ապրելով Իրաք` կազմած են ընտանիք, աշխատած ու կրցած են վերագտնել իրենց:

2006 թուականին Աւագեանները որոշեցին հաստատուիլ հայրենիք եւ այսօր կը համարեն, որ ատիկա եղած է իրենց կեանքի կարեւորագոյն որոշումը ու երբեք չեն զղջար ատոր համար:

Կարինը` լսելով Ցեղասպանութեան մասին, նաեւ Իրաքի մէջ տեսնելով պատերազմական իրավիճակները` խաղաղութիւնը կ’ընկալէ այսպէս. «Խաղաղութիւն ըսելով ես կը հասկնամ ներողամտութիւն ու հանդուրժողականութիւն, եթէ մարդիկ ներողամիտ եւ հանդուրժող ըլլան իրարու  նկատմամբ, չեն ըլլար վէճեր, կռիւներ առաւել եւս` պատերազմներ»:

«Հայերն այսօր»-ի հետ զրոյցին իրաքահայ Կարին Աւագեան ըսաւ, որ երբեք չէր մտածեր, թէ օր մը Հռոմի Պապին տեսնելու հնարաւորութիւն կ’ունենար` այն ալ այդքան մօտէն. «Երբ իմացայ, որ պիտի մասնակցիմ Հռոմի Պապի հետ հանդիպման արարողութեան, այնչափ ուրախացայ, որ այդ պատմական իրադարձութեան մասնիկը պիտի դառնամ: Մեծ երջանկութիւն է տեսնել նման կարեւոր եւ խաղաղասէր անձի` յանձին Սրբազան Քահանայապետին»:

Կարինը շատ կը ցանկայ, որ Հռոմի Պապի այցելութիւնը վճռորոշ դառնայ Հայաստանի համար` նպաստելով տարածաշրջանին մէջ խաղաղութեան հաստատման:

Scroll Up