«Ճգնաժամի Հինգ Տարին. Նոր Կեանքի Մաքառման Հինգ Տարին» Խորագիրով Ձեռնարկ` Նուիրուած Փախստականներու Համաշխարհային Օրուան

Յունիս 18-ին Մարիոթ հիւրանոցի Արարատ սրահին մէջ տեղի ունեցաւ Փախստականներու համաշխարհային օրուան նուիրուած` «Ճգնաժամի հինգ տարին. նոր կեանքի մաքառման հինգ տարին» խորագիրով` ՄԱԿ ՓԳՀ-ի եւ Օքսֆամ կազմակերպութեան համատեղ ձեռնարկը, որ իրականացաւ ՄԱԿ ՓԳՀ-ի` «Մենք կանգնած ենք փախստականներու կողքին» եւ Օքսֆամի «Սուրիոյ կողքին» քարոզարշաւներու ծիրէն ներս:

Բացման խօսքով հանդէս եկան ՀՀ սփիւռքի նախարար Հրանոյշ Յակոբեան, ՄԱԿ ՓԳՀ գրասենեակի հայաստանեան մասնաճիւղի ներկայացուցիչ Քրիստոֆ Պիրուիրթը եւ Օքսֆամ մասնաճիւղի տնօրէն Մարգարիտա Յակոբեան:

Ողջունելով ներկաները` ՀՀ սփիւռքի նախարարը նշեց. «Սիրելի՛ սիրիահայեր, ուրախ եմ այսօր ողջունել ձեզ ձեր Հայրենիքում: Ամենախելացի որոշումը, որ կայացրիք սիրիական պատերազմի առաջին օրերին, ձեր Հայրենիք վերադառնալն էր: Շնորհակալութիւն: Ուրախ եմ, որ այստեղ կարողանում էք աշխատել, ստեղծագործել, նուիրուել եւ ձեր ներդրումն ունենալ Հայաստանի զարգացման գործում: Ուզում եմ հաւատալ, որ դժուարութիւնները ետեւում են մնացել: Մենք բոլորս` պետութիւնը, Սփիւռքի նախարարութիւնը, ՄԱԿ-ի գրասենեակը, միջազգային կազմակերպութիւնները, պէտք է անենք ամէն ինչ, որ կարողանաք աշխատել, հզօրանալ, հզօրացնել մեր Հայրենիքը: Այսօր նշում ենք Փախստականի օրը, որը եւ՛ ձերն է, եւ՛ ձերը չէ. դուք փախստական չէք, դուք ձեր Հայրենիքում էք»:

Օքսֆամ մասնաճիւղի տնօրէն Մարգարիտա Յակոբեան նշեց, որ աշխարհի մէջ փախստականներու թիւը կը մեծնայ, եւ ատիկա անհանգստացնող մարտահրաւէր է բոլորին համար: Դիմելով սուրիահայերուն` ան աւելցուց. «Դուք փախստական չէք, դուք մեր հայրենակիցներն էք, եւ ձեր մշակոյթը բերել էք մեր երկրի զարգացման գործին: Սփիւռքի նախարարութեան հետ համատեղ ծրագրեր ենք իրականացնում, որոնք կը նպաստեն Հայաստանում ձեր կայացման եւ ինտէգրման գործընթացին: Դուք կարողանում էք ինքնաբաւ լինել»:

ՄԱԿ ՓԳՀ գրասենեակի հայաստանեան մասնաճիւղի ներկայացուցիչ Քրիստոֆ Պիրուիրթը շեշտեց. «Մեծարգո՛յ պարոն դեսպան, տիկի՛ն նախարար, յարգարժա՛ն հիւրեր, այսօր կը նշենք օր մը, որ նուիրուած է այն մարդոց, որոնք ստիպուած  եղած են տեղահանուիլ եւ ապահով հանգրուան գտնել: Երբ կ’ըսենք ճգնաժամի 5 տարի, կ’ըսենք 5 տարի ոչնչացում, տառապանք եւ մահ: Ցաւօք, Սուրիոյ պատերազմը եզակի չէ, աշխարհի մէջ կան երկիրներ, որ կործանման եզրին են: Շատ փխրուն բան է խաղաղութիւն ըսուածը: Սուրիոյ պատերազմի 5 տարին եղած է մաքառման 5 տարի: Սուրիահայերուն Հայաստանի մէջ օգնած են եւ՛ կառավարութիւնը, եւ միջազգային ու հասարակական կազմակերպութիւնները, եւ՛ բնակչութիւնը: Կ’ուզեմ շնորհակալութիւն յայտնել Սփիւռքի նախարարին արդիւնաւէտ աշխատանքի եւ համագործակցութեան համար»:

Ներկաները մէկ վայրկեան լռութեամբ յարգեցին սուրիական պատերազմի զոհերու յիշատակը:

Հնչեցին Զարուհի Բաբայեանի եւ իր երգի արուեստանոցի սաներու «Աւէ Մարիա», «Կիլիկիա» ստեղծագործութիւններու հիանալի կատարումները:

Ձեռնարկի ծիրէն ներս տեղի ունեցաւ տեղահանուած սուրիացի գործարարներու ձեռագործ աշխատանքներու ցուցահանդէս-վաճառք, ինչպէս նաեւ` փախստականներու թեմատիկ լուսանկարներու-ցուցահանդէս եւ յիշատակի մոմավառութեան արարողութիւն:

Ձեռնարկը աւարտեց փախստականներու պատմութիւնները ամփոփող ՄԱԿ ՓԳՀ «Խաչմերուկներ» գիրքի շնորհանդէսով:  Ցուցադրուեցաւ սուրիացի ոճաբան Գէորգ Շատոյեանի երեխաներու հագուստի հաւաքածուն:

2 3 4 5 6 7 8

Scroll Up