«Մեր Նպատակն Է Շարունակական Օգնութիւն Ցուցաբերել Հայաստան Բնակող Մեր հայրենակիցներուն». Լիլի Աւագեան

Յունիս 12-ին ԱՄՆ-ի մէջ կը կայանայ հեռուստամարաթոն` նուիրուած հայ զինուորին: «Քեզ հետ եմ, հա՛յ զինուոր» խորագիրով հերթական միասնական գործը` ի նպաստ հայրենիքի` Հայաստանի եւ Արցախի, նախաձեռնած է «Support Armenia» բարեգործական կազմակերպութիւնը:

Կը ներկայացնենք «Հայերն այսօր»-ի հարցազրոյցը կազմակերպութեան համահիմնադիր Լիլի Աւագեանի հետ:

Լիլի՛, ի՞նչ նպատակով  հիմնադրուած է «Support Armenia» բարեգործական կազմակերպութիւնը:

– Կազմակերպութեան նպատակն է տարբեր ծրագիրներու միջոցով` շարունակական օգնութիւն ցուցաբերել Հայաստան բնակող մեր հայրենակիցներուն:

Ովքե՞ր են նախաձեռնողները:

– «Support Armenia» շահոյթ չհետապնդող, բարեգործական կազմակերպութեան հիմնադիրներն են Յովիկ Զիրաքեան, Դաւիթ Ղեւոնդեան եւ ես:

Այս անգամ կազմակերպութիւնը նախաձեռնած է «Քեզ հետ եմ, հա՛յ զինուոր» արշաւը: Ին՞չ շրջանակ եւ տարածում  հասցուցած է ընդգրկել եւ ովքե՞ր  արձագանքած են նախաձեռնութեան:

– «Քեզ հետ եմ, հա՛յ զինուոր» նախաձեռնութեան միացած են տարբեր երկիրներու մէջ բնակող շարք մը յայտնիներ, ովքեր նկարուած են նուռը ձեռքին եւ լուսանկարը տեղադրած իրենց ֆէյսպուքեան էջին վրայ` «Քեզ հետ եմ, հա՛յ զինուոր» գրառմամբ` ի նշան միասնութեան: Սա համընդհանուր` Հայրենիք-Սփիւռք-ը միաւորող միասնական ծրագիր է: Ունինք նաեւ բազմաթիւ կամաւորներ, ովքեր ջանք ու եռանդ չեն խնայեր ծրագիրը ի կատար ածելու:

Յունիս 12-ի հեռուստամարաթօնին ընդառաջ ի՞նչ աշխատանքներ կ’ընթանան:

– Հեռուստամարաթոնը 13 ժամ տեւողութեամբ ծրագիր է, որ պիտի հեռարձակուի ուղիղ եթերով եւ 6 հեռուստաալիքներով միաժամանակ: Մեծ աշխատանք կը տարուի թէ 13 ժամ տեւողութեամբ ծրագիրը կազմելու, թէ զինուորներուն մասին ճշգրիտ տեղեկութիւններ հաղորդելու համար:

Լիլի՛, հաւաքուած դրամական միջոցները ի՞նչ եղանանով պիտի բաժնուին եւ ընտրութիւնը ինչպէ՞ս պիտի կատարուի:

– Նախաձեռնութեան կազմակերպիչները` Յովիկ Զիրակեան, Դաւիթ Ղեւոնդեան եւ ես, ինչպէս նաեւ` կազմակերպութեան այլ անդամներ, Յուլիսի սկիզբը կը ժամանեն Հայաստան` անձամբ հանդիպելու վիրաւորներու եւ զոհուածներու ընտանիքներուն հետ:

Լիլի՛, թէեւ Դուք չէք սիրեր բարձրաձայնել այդ մասին, բայց տեղեակ եմ, որ Արցախեան քառօրեայ պատերազմի օրերուն դուք Հայաստան էիք եւ մեկնած էք նաեւ Արցախ:

– Ճիշդ էք, ես չեմ սիրեր այդ մասին շատ խօսիլ, բարձրաձայնել: Պարզապէս կ’ուզէի այդ օրերուն Արցախի մէջ ըլլալ: Ես մեկնեցայ սահման, եղայ դիրքերու մէջ` մեր զինուորներուն կողքին, ու իմ աչքերով տեսայ, թէ անոնք ինչ պայմաններու մէջ  մեր բոլորի հայրենիքը կը պաշտպանեն: Այդ այցելութիւնը մօտ 10 տարիով ինծի հասունցուց: Եթէ մինչեւ այսօր որեւէ բան չէր կրնար փոխել իմ ներաշխարհս ու եթէ մինչ այդ պահը ես ամէն ինչին, վարդագոյն ակնոցներով կը նայէի, այդ  քանի մը ժամը իմ կեանքս տակնուվրայ ըրաւ, 180 աստիճանով ամէն ինչ փոխեց:
Երբ վերադարձայ ԱՄՆ, տեսայ, որ այստեղ նոյնպէս նոյն մթնոլորտն է: Շատ-շատերը, անգամ անոնք, որոնք երբեւէ Հայաստան չեն եկած կամ շատ փոքր տարիքին  հեռացած են ու բնակութիւն հաստատած ԱՄՆ-ի մէջ, պատրաստ էին գալ ու կռուիլ հայրենիքի համար: «Support Armenia» կազմակերպութեան համահիմնադիր Յովիկ Զիրաքեան  խումբ մը երիտասարդներ  հաւաքած էր ու պատրաստ էր մեկնելու Արցախ, սակայն ըսին, որ այլեւս կամաւորներու կարիք չկայ: Անգամ եղբայրս, որ 22 տարեկան է եւ Հայաստան վերջին անգամ 10 տարեկանին  եկած է, պատրաստ էր գալու մեր զինուորներուն կողքին կանգնելու, հայրենիքը պաշտպանելու: Ճիշդ է, մենք Հայաստան չենք ապրիր, բայց այստեղ բոլորը ամէն ինչ կ’ընեն յանուն հայրենիքի:

Լուսինէ Աբրահամեան

Հ.Գ. «Հայերն այսօր»ը կը ներկայացնէ փոքրիկ տեղեկատուութիւն` «Support Armenia» բարեգործական կազմակերպութեան հիմնադիրներուն մասին:

Hovik Zirakyan
Յովիկ Զիրաքեան. 2001թուականին հիմնադրած է Լոս Անճելըսի «Միացեալ հայ երիտասարդներ» կազմակերպութիւնը, որուն նախագահը հանդիսացած է մինչեւ 2006 թուական: Յովիկ Զիրաքեան նաեւ Հոլիւուտի մէջ ամէն տարի Ապրիլ 24-ին տեղի ունեցող եւ հարիւր հազարաւոր հայերու համախմբող քայլարշաւ-ցոյցի հիմնադիր-կազմակերպիչն է: Տարիներ շարունակ հասարակական եւ բարեգործական գործունէութիւն  ծաւալած է Լոս Անճելըսի հայ համայնքին մէջ:

Լիլի Ավագյան
Լիլի Աւագեան. 2009-2010 թուականներուն հանդիսացած է Կլենտէլի ուսումնական հաստատութեան ուսանողական խորհուրդի նախագահ եւ կրթական խորհուրդի անդամ, ճանչցուած է «Տարուայ մարդ», 2011 թուականէն կը հանդիսանայ Կլենտէլի քաղաքապետարանի «Հայոց ցեղասպանութեան յիշատակման» եւ «Ի դէմ մարդկային անարդարութեան» յանձնախումբերու անդամ: Մինչ 2014 թուական աշխատած է Կլենտէլ քաղաքի կեդրոնի զարգացմամբ զբաղող «Downtown Glendale» կազմակերպութեան հասարակական կապերու ղեկավար: Լիլի Աւագեան նաեւ լրագրող-հաղորդավարուհի է:

David Ghevondyan1

Դաւիթ Ղեւոնդեան. 2003 թուականին Լոս Անճելըսի մէջ հիմնադրուած ATV հեռուստաընկերութեան համահիմնադիր, «Միացեալ հայ երիտասարդներ» կազմակերպութեան նախկին անդամ,  շարք մը ընկերութիւններու եւ բարեգործական կազմակերպութիւններու (marketing) առեւտուրի  յառաջատար մասնագէտ, ֆիլմեր արտադրող, բազմաթիւ ծրագիրներու բեմադրիչ:

 

Scroll Up