Յայտագիրը սկիզբ առաւ վարժարանիս Տնօրէնուհի՝ Տիկ. Պէթթի Գրաճեան Եփրեմեանի բացման խօսքով: Ան իր խօսքին մէջ մատնանշեց այսօրուան հաւաքին նպատակը բացատրողականութեամբ եւ առօրեային կիրարկուելիք մեր պարտականութիւններու գիտակցութեամբ:
Ապա 10-րդ կարգի աշակերտները՝ Սարօ Արման Չուլճեան, Սիլվա Արմանի Չուլճեան, Արին Շահինեան, Քրիստափոր Մինասեան եւ Շողեր Գերպապեան հանդէս եկան թատերական ներկայացումով մը, ուր մարմնաւորուեցաւ Մեծանուն բանաստեղծ Դանիէլ վարուժանի տիպարը եւ անոր առընթեր հայ ժողովուրդի տարիներու մղած պայքարն ու պահանջատիրութեան աշխատանքները:

Թատերական ներկայացման զուգահեռ գեղարուեստական յայտագիրով աշակերտները իրենց մասնակցութիւնը բերին նուագակցութեամբ եւ ասմուքով: 6-րդ Կարգէն Լուսինէ Սազեան եւ Բերլա Խաչքըզեան ասմունքեցին Համաստեղի «Հայու Ոգին», առաջին կարգէն խումբ մը աշակերտներ՝ Յ. Շիրազի «Ո՞րն է Պապօ» քերթուածը: Շողեր Գերպապեան եւ Նարինէ Սազեան ֆլիւթի վրայ նուագեցին «Կոտորածն Անգութ» կտորը, ինչպէս նաեւ իրենց մասնակցութիւնը բերին «Կիլիկիա» երգի նուագակցութեամբ իրենց ընկերներուն հետ, ինչպէս՝ Մասիս Արսլանեան «ջութակ», Մանօ Միւրէգեան«ֆլիւթ», Քրիստ Եաղճեան «դաշնակ» եւ Զոհրապ Միւրէգեան «թագ ջութակ»:

Ծիծեռնակաբերդի յուշահամալիրի բացատրողական ներկայացում կատարեց Միրնա Քէպապճեան զուգորդուած սահիկի ցուցադրութեամբ:

Աւարտին բոլոր աշակերտները փունջ մը հայրենասիրական եւ ազգային երգեր երգեցին: Ձեռնարկը փակուեցաւ «Մեր Հայրենիք» քայլերգի երգեցողութեամբ: