Հուռի Կեպէշեան. «Ինծի համար մեծ պատիւ կ’ըլլայ ներկայացնել Հայաստանը Ողիմպիական խաղերուն»

Հայաստանի մարմնամարզութեան հաւաքականի անդամ, ԱՄՆ-ը բնակող Հուռի Կեպէշեան հպարտ է ներկայացնելու Հայաստանը միջազգային ասպարէզի մէջ:

«Կը կարծեմ` լաւ ելոյթ ունեցայ: Ճիշդ է` վար ինկայ գերանէն, բայց այդպիսի բաներ երբեմն կ’ըլլան: Իյնալէ յետոյ հաւաքուեցայ, ուժերս կեդրոնացուցի եւ աւարտին հասցուցի ելոյթս աւելի լաւ, քան կը սպասէի: Ես ուրախ էի ներկայացնելու իմ հայրենիքս, լաւ արդիւնք գրանցելով եւ հպարտանալու առիթ տալով հայրենակիցներուս: Ինծի համար մեծ պատիւ կ’ըլլայ ներկայացնել Հայաստանը Ողիմպիական խաղերուն: Ես կ’ըլլամ իմ երկիրս ներկայացնող առաջին կինը այս մարզաձեւին մէջ, ատիկա հպարտութիւնս ու պատասխանատուութիւնս կրկնակի կը դարձնէ: Մինչեւ Ողիմպիական խաղեր չեմ կարծեր, որ կը ժամանեմ Հայաստան: Ցաւօք սրտի, հեռաւորութիւնը մեծ է: Ես եւ մարզիչս միշտ կապի մէջ ենք պարոն Սերոբեանի հետ, անոնք միշտ հետաքրքրուած են եւ կը հետեւին ինծի: Յետագային ուրախ կ’ըլլամ այցելելու Հայաստան»,- Կեպէշեանի խօսքերը մէջբերած է ՀԱՕԿ-ի պաշտօնական կայքը:

Հոկտեմբեր 23-էն Նոյեմբեր 1 Սկովտիոյ մայրաքաղաք Կլասքոյի մէջ տեղի կ’ունենայ մարմնամարզութեան աշխարհի առաջնութիւնը, որ վարկանշային է 2016 թուականի Ողիմպիական խաղերուն համար: Հայաստան կը ներկայացնեն Վահագն Դաւթեան, Յարութիւն Մերտինեան, Արթուր Դաւթեան եւ Հուռի Կեպէշեան: Հայաստանի հաւաքականը Կլասքօ մեկնած է Հոկտեմբեր 17-ին:

Scroll Up