Նազարէթ Պինաթլի .«Անբացատրելի կապուածութիւն ունիմ Հայրենիքիս հետ»

Հոկտեմբեր 5-7 կայացաւ Ճարտարապետներու համահայկական 3-րդ համաժողովը, որ կազմակերպած էին ՀՀ սփիւռքի եւ քաղաքաշինութեան նախարարութիւնները, Ճարտարապետներու եւ ճարտարագէտներու համահայկական ընկերակցութիւնը,  ՀՀ Ճարտարապետներու միութիւնը: Այս առիթով «Հայերն այսօրի» թղթակիցը  զրուցած  է  Թուրքիայէն ժամանած «Հայճար» ճարտարապետներու եւ ճարտարագէտներու միութեան հիմնադիր, սթամպուլահայ ճարտարապետ Նազարէթ Պինաթլիի հետ, որ Ճարտարապետի միջազգային օրուան առիթով պարգեւատրուած է ՀՀ սփիւռքի նախարարութեան «Արշիլ Գորկի»  մետալով:

Պարոն Պինաթլին զրոյցի սկիզբը ըսաւ, որ շատ կը սիրէ Հայաստանը, անբացատրելի կապուածութիւն ունի Հայրենիքին հետ, այնքան, որ բնակարան  գնած է Երեւանի մէջ: Շատ կը սիրէ յատկապէս Հիւսիսային պողոտան եւ Պարոնեան փողոցը: Իսկ Հայաստանի մէջ իրականացուող շինարարական աշխատանքներուն, կառուցուող շինութիւններուն վերաբերեալ դրական կարծիք ունի, կ’ըսէ, որ այս առումով Հայաստանի մէջ բաւականին յառաջընթաց կը նկատուի:

«Հայճար» միութիւնը հիմնադրուած է տաս տարի առաջ, որ Թուրքիոյ մէջ շինարարական տարբեր նախագիծեր կ’իրականացնէ: «Հայճար»-ի գործունէութեան մաս կը կազմեն համայնքային կալուածներու վերանորոգման եւ վերակառուցման աշխատանքները: Միութեան ստեղծման շարժառիթներէն մէկն ալ Թուրքիոյ մէջ ապրող ճարտարապետներուն, շինարարներուն  համախմբելն ու քննարկումներ կազմակերպելն է: Ի դէպ, միութիւնը 200 անդամ ունի, որոնք ելեկտրագէտ-ճարտարագէտներ, արհեստաւորներ, ճարտարապետներ եւ այլ մասնագիտութիւն ունեցող մարդիկ են:

Միութեան կողմէ կատարուած աշխատանքներէն են Սթամպուլի Պեշիքթաշի Սուրբ Աստուածածին, Տիարպեքիրի Սուրբ Կիրակոս, Աղթամար կղզիի Սուրբ Խաչ եկեղեցիներու, Պեշիքթաշի հայկական վարժարանի շէնքի եւ այլ կառոյցներու վերանորոգումը: Աշխատանքային խումբը տարին գոնէ երկու անգամ կ’այցելէ այդ վայրերը եւ կ’իրականացնէ տարաբնոյթ ուսումնասիրութիւններ: Մշտապէս ուշադրութեան կեդրոնին մէջ կը պահեն վնասուած եկեղեցիները:

Վերջերս ճարտարապետը, ճանաչողական այցելութիւն կատարելու նպատակով, սթամպուլահայերու 70 հոգինոց խումբի մը ուղեկցած է Հայաստան, որոնց մէջ ճարտարապետներ  եղած են, նաեւ մարդիկ, որոնք առաջին անգամ կ’այցելէին Հայաստան:

Խօսելով մասնագիտական համաժողովներու կազմակերպման մասին` Նազարէթ Պինաթլին ըսաւ. «Կարեւոր կը համարեմ այս համաժողովները, քանի որ հնարաւորութիւն կ’ունենանք ծանօթանալու տարբեր երկիրներու մէջ ապրող մեր գործընկերներուն հետ, միտքեր փոխանակելու, յետագայ համագործակցութեան ուղիներ որոնելու: Համաժողովը պատեհ առիթ է նաեւ մէկ անգամ եւս Հայաստան այցելելու»,-ըսաւ ճարտարապետը:

Գէորգ Չիչեան

 

Scroll Up