ՀՀ սփիւռքի նախարարը ընդունեց Սթամպուլի «Ժամանակ» թերթի խմբագիր Արա Գոչունեանը

Հոկտեմբեր 8-ին ՀՀ սփիւռքի նախարար Հրանոյշ Յակոբեան ընդունեց Սթամպուլի «Ժամանակ» օրաթերթի գլխաւոր խմբագիր Արա Գոչունեանը:

Զրոյցի ընթացքին քննարկուեցան սթամպուլահայ համայնքի ազգային-մշակութային կեանքի անցուդարձին առնչուող հարցեր:

Արա Գուչունեան նախարարին նուիրեց Սեւան Տէյրմէնճեանի աշխատասիրութեամբ վերջերս հրատարակուած պոլսահայ նշանաւոր գրող Երուխանի (Երուանդ Սրմաքէշխանլեան) «Փոքր Ասիոյ մէջէն» յօդուածներու եւ նորավէպերու ժողովածուն, որ «Ժամանակ» օրաթերթին կողմէ հրատարակուող մատենաշարի հերթական հատորն է: Ինչպէս  տեղեկացուց Ա. Գոչունեան, յառաջիկային լոյս կը տեսնէ մատենաշարի յաջորդ` Ռուբէն Զարդարեանին նուիրուած հատորը: Ան նաեւ նշեց, որ ստեղծուած է «Ժամանակ» օրաթերթի ելեկտրոնային կայքէջ, որուն շնորհիւ մեծցած է թերթի ընթերցողներու թիւը:

Համաձայնութիւն ձեռք բերուեցաւ յառաջիկային նախարարութեան աջակցութեամբ իրականացնել «Ժամանակի» կողմէ հրատարակուող պոլսահայ գրողներու մատենաշարի եւ թերթի ելեկտրոնային կայքի շնորհանդէսը:

Scroll Up