Տիգրան Համասեան «Լոյս ի Լուսոյ»-ի թրքական «ուխտագնացութեան» մասին

Հոկտեմբեր 4-ին Արամ Խաչատրեան համերգասրահին մէջ կայացած է երաժիշտ, երգահան Տիգրան Համասեանի մենահամերգը: Համերգի, «Լոյս ի Լուսոյ»-ի թրքական «ուխտագնացութեան» ու նոր ծրագիրներու մասին երաժիշտին հետ զրուցած է PanARMENIAN.Net-ը:

Մասնաւորապէս, անդրադառնալով «Լոյս ի Լուսոյ» նախագիծին, Համասեան յատկապէս առանձնացուցած է դէպի Թուրքիա «ուխտագնացութիւնը», ինչպէս ինք` Համասեան  զայն կը կոչէ:

«Թուրքիոյ մէջ մեզի շատ բուռն ընդունեցին, կ’ըսէին` «Հայերը, ինչ կ’ուզեն, կ’ընեն, չափերը անցած են»: Իրենց նախարարութենէն համերգները իրականացնելու թոյլտւություն ունէինք, բայց, չնայած ատոր, մեզի կը սպառնային, ըսելով` «Դուրս պիտի գանք հայեր որսի»: Մէկ խօսքով, ինչպէս կան, այդպէս ալ իրենց կը դրսեւորէին: Կայսերիի մէջ (պատմական Կեսարիա), ուր հայութիւն հիմա գրեթէ չկայ, հայկական  եկեղեցի մը կայ: Երբ կը հասնէինք քաղաք, եկեղեցւոյ հայ ատենապետը ոստիկաններ  ուղարկած էր, որ ուղեկցին մեզի, նոյնիսկ երբ հաց կ’ուտէին, այդ ժամանակ  մեզի կը հսկէին»,- պատմած է Համասեան:

Անոր խօսքով, եկեղեցւոյ հայ ատենապետը վախցած էր, որ տեղացիները յանկարծակի կրնան վնասել իրենց: Կ’ըսէ` Թուրքիոյ մէջ համերգներուն հայեր ալ կու գային, բայց մեծամասնութիւնը թուրքեր ու քիւրտեր էին:

«Շատերը համերգի ժամանակ մօտէն անցնելուն կը  տեսնէին, որ համերգ է, կը նստէին ու կը սկսէին լսել: Այդ առումով համերգներուն ներկայ թուրք հանդիսատեսը շատ լաւ  տրամադրուած էր: Հիանալի զգացողութիւններ ունեցանք Սթամպուլի 2 համերգի ժամանակ: Երկուքն ալ լեփլեցուն դահլիճներու մէջ անցան, մօտ 1200 հանդիսատեսով»,- ըսած է երաժիշտը` նշելով, որ մօտ 8 տարի է` կը մերժէր Սթամպուլի մէջ համերգ տալու առաջարկները, որուն պատճառով ալ շատ սպասուած հանդիպումներ էին:

Համասեան պատմած է, որ արդէն մօտ 3 շաբաթ է` աշխարհի մէջ վաճառքի հանուած է «Լոյս ի Լուսոյ»-ի ձայնասկաւառակը, ու արդէն Հոկտեմբեր 8-ին Եւրոպայով շրջագայութեան պիտի մեկնին` ներկայացնելու զայն: Ընդհանուր առմամբ, մօտ 10 համերգ պիտի ունենան, որոնց ընթացքին կ’ըլլան Լոզանի, Փարիզի մէջ, ուր պիտի նուագեն եւրոպական ամենամեծ եկեղեցիներէն մէկուն մէջ, Լիոնի մեծ սրահին մէջ եւ այլուր: Որոշած են յառաջիկային ցուցահանդէս կազմակերպել, ուր իւրօրինակ կերպով կարգաւորուած  պիտի ներկայացնեն:

«Կ’ըլլայ  ձայն, վիտիօ եւ լոյս. Կ’ուզենք ցոյց տալ այն ամէնը, ինչ այս ընթացքին վերապրած ենք,  իւրօրինակ արուեստի գործ պիտի ունենանք: Առաջին ցուցադրութիւնը կ’ըլլայ Միւնխենի մէջ`Հոկտեմբեր 24-ին, երկրորդը` Գիւմրի, այս ամսուան 29-ին»,- ըսած է երաժիշտը:

Scroll Up