Ինչպէ՞ս կ´ընտրուի «Միւռոնի կնքահայրը»

Սեպտեմբեր 27-ին Մայր Աթոռ Սուրբ Էջմիածինի մէջ տեղի կ’ունենայ Միւռոնօրհնէքի  սրբազան արարողութիւնը: Արարողութեան ժամանակ իր դերակատարումը կ´ունենայ նաեւ միւռոնօրհնէքի կնքահայրը` «Միւռոնի կնքահայրը»:

Թէ ինչպէս  կ´ընտրուի «Միւռոնի կնքահայրը» եւ ի՞նչ է անոր առաքելութիւնը, «Հայերն այսօրի» լրագրող Գէորգ Չիչեանի խնդրանքով կը տեղեկացնէ Մայր Աթոռի Տեղեկատուական համակարգը:

Սրբազան  աւանդութեան համաձայն, երբ Սբ. Գրիգոր Լուսաւորիչը Սրբալոյս Միւռոնի օրհնութիւն կատարեց, Միւռոնի կնքահայրութեան պատիւը շնորհեց հայոց Տրդատ արքային, որ ստանձնեց հայութեան համար պատրաստուած հրաշազարդ իւղի պաշտպանութիւնն ու հովանաւորութիւնը:

Հայ Եկեղեցւոյ  որոշ արարողակարգեր, ինչպիսին Ջրօրհնէքն է կամ Միւռոնօրհնէքը, ունին իրենց «Կնքահայրերը»: Ջրօրհնէքի կնքահօր կ´անուանեն «Խաչի կնքահայր», իսկ Միւռոնօրնէքի կնքահօրը`«Միւռոնի կնքահայր»: Վերջին շրջանին այս երկու արարողութիւններու կնքահայրերը եկեղեցանուէր աշխարհականներ են` ի նշան հաւատացեալ  ժողովուրդի աղօթքներուն: Կնքահայրը ունի իր կարեւոր դերակատարութիւնը Միւռոնօրհնէքի ընթացքին: Միւռոնօրհնէքի թափօրին մէջ` անմիջապէս Հայրապետին առջեւը, ծիսական մետաքսէ շապիկով, կը քալէ կնքահայրը, որ սովորաբար բարձրանալով Բեմ, կ´օգնէ բանալու  Կաթսան:

Հայ Առաքելական Եկեղեցւոյ մէջ Սրբալոյս Միւռոնի օրհնութիւնը սովորաբար տեղի կ´ունենայ 7 տարին մէկ: Միւռոնօրհնէքը կը կատարէ Ամենայն Հայոց Կաթողիկոսը, իսկ Միւռոնի Կնքահայրը կը ներկայացնէ համայն հայութիւնը: Ջրօրհնէքի արարողութիւնը, ի տարբերութիւն Միւռոնօրհնէքի, տեղի կ´ունենայ հայկական բոլոր եկեղեցիներուն մէջ, եւ իւրաքանչիւր Եկեղեցի ունի Խաչի իր կնքահայրը: Խաչի կնքահայր կ´ընտրուին եկեղեցական համայնքի ամենատարբեր խաւի մարդիկ, որոնք տարուան ընթացքին իրենց մասնաւոր զօրակցութիւնը կը բերեն տուեալ եկեղեցւոյ առաքելութեան, կ´աջակցին հոգեւոր հովիւին` կեանքի կոչելու անոր կողմէ նախաձեռնած եկեղեցաշէն ծրագիրները:

Միւռոնի կնքահայրը կ´ընտրուի` հաշուի առնելով ազգային-եկեղեցական  կեանքին մէջ անոր ունեցած աւանդը: Կնքահայրութիւնը նաեւ Եկեղեցւոյ գնահատանքն է ազգային եւ եկեղեցական կեանքէն ներս տուեալ անձի ունեցած կարեւոր աւանդին եւ վաստակին:

2015 թուականի Միւռոնի կնքահայր ընտրուած է Մայր Աթոռի բարերար գանատահայ Հայկ Թիթիզեան:

Ի դէպ, 2015 թուականին նախորդող երկու Միւռոնօրհնէքի կնքահայր  եղած են արժանթինահայ բարերար Էտուարտօ Էռնեկեան (2001թ.) եւ ամերիկահայ բարերար Սարգիս Պետեւեան (2008թ.):

 

Scroll Up