Հողը կը պահեն ոչ միայն մշակելով զայն, այլեւ պէտք եղած պահուն` նաեւ զէնքով

Արցախի բնակեցուած տարածքները ենթակառուցուածքներով ապահովելու խնդիրը շատ յաճախ կը լուծուի անհատական նախաձեռնութիւններով: Ատոնցմէ մէկն ալ «Հայրենասէր» կազմակերպութեան դրամահաւաքի միջոցով Արցախի Քաշաթաղի շրջանի Վուրգաւան գիւղին մէջ առաջնային ենթակառուցուածքներու համալիրի ստեղծումն է: «Արմէնփրէս»­-ը կը ներկայացնէ Երեւանէն Քարվաճառ բնակութեան տեղափոխուած Թամարա Գրիգորեանի անդրադարձը վուրգաւանցիներուն, անոնց

առօրեային եւ ապագայ ծրագիրներուն:

Գէորգի Խաչատրեան` Վուրգաւանի գիւղապետ

Վուրգաւան գիւղի գիւղապետ Գէորգի Խաչատրեան այստեղ կը բնակի Վուրգաւանի վերաբնակեցման առաջին տարիներէն, 1995-­96 թթ․: Ջերմուկ քաղաքէն է, մասնակցած է Արցախեան ազատամարտին, Քաշաթաղի շրջանի
ազատագրման գործողութիւններուն: Հրադադարի կնքումէն ի վեր, երբ սկսած է ազատագրուած Քաշաթաղի վերաբնակեցումը, Գէորգին բնակութիւն  հաստատած է այստեղ: Ընտանիքին հետ նախ բնակած է Աղաւնօ (նախկին Զապուխ) գիւղին մէջ: Երկու տարի ապրած են այստեղ:

Ինչպէ՞ս եւ ինչու՞ տեղափոխուեցան Վուրգաւան

«Բայց այդ գիւղին մէջ ջուրի խնդիր կար, չէի կրնար իմ ուզած ձեւով ցանքս, հողս մշակեմ, տեղափոխուեցանք Վուրգաւան»,­- կը պատմէ Գէորգին, որ Վուրգաւանի մէջ  արդէն 20 տարիէ աւելի կ’ապրի: Կը սիրէ իր գիւղն ու շատ կապուած է հողին: Ինքն իր ձեռքով երեք խաչքար  պատրաստած է` նուիրուած պատերազմին ինկած տղոց յիշատակին, ու ատոնք տեղադրած Վուրգաւանի  ու հարեւան երկու գիւղերուն մէջ: «Որ գիւղին մէջ խաչքար կայ, հայ մարդը այդ հողին կապուած կը զգայ»,­-կ’ըսէ ան: Առաջին տարիներու դժուարութիւններուն մասին (որոնք,
անխօս, շատ֊­շատ  եղած են) Գէորգին յատուկ կերպով յիշել չի ցանկար:

Հողը կը պահէ ոչ միայն զայն մշակելով, այլեւ պէտք եղած պահուն` նաեւ զէնքով

Արցախեան ազատամարտին մասնակցած Գէորգին միշտ պատրաստ է զէնքը ձեռքին պահպանելու իր ազատագրածը, իր սրբազան հայրենիքը, ուր ինք խաչքար  կը տեղադրէ: Անցած տարուան օգոստոսեան լարուած օրերուն Քաշաթաղի մէջ առաջիններէն էր, որ միացաւ դիրքապահ տղոց ու ըսաւ` դուք մինակ չէք, մեր հայրենիքը
իրար հետ պիտի պաշտպանենք: Գնաց մարտական դիրքեր ոչ թէ հէնց այնպէս, ցոյց տալու համար, այլ իսկապէս կռուեցաւ լարուած այդ օրերուն, մասնակցեցաւ վտանգաւոր ներթափանցող խումբի յայտնաբերման ու վնասազերծման, պարգեւատրուեցաւ իր սխրագործութեան համար:

Իր զաւակներուն ապագան կը տեսնէ հէնց Վուրգաւանի մէջ

Գէորգին Վուրգաւանի մէջ այգի կը մշակէ, կեանք տալով հողին: «Երեխաներս ալ բոլորը Վուրգաւանի մէջ են․ այստեղ ծնած են, այստեղ ամուսնացած, այստեղ ալ կ’ապրին ու երթալու միտք չունին»,­ կ’ըսէ ան: Գէորգիի 10 թոռնիկներն ալ կ’ապրին Վուրգաւան․ անոնցմէ ամենամեծը` Սիւզին, այս տարի կը փոխադրուի երկրորդ դասարան, միւս թոռնիկն ալ այս տարի դպրոց կ’երթայ: «Հայրենասէր» կազմակերպութիւնը Գէորգիի եւ միւս
վուրգաւանցիներու երեխաներուն ու թոռնիկներուն համար այս տարի կը վերակառուցէ գիւղի կիսախարխուլ դպրոցը, որ նորօրեայ վուրգաւանցին դպրոց յաճախէ յարմարաւէտ, ապահով, ժամանակակից ու ազատագրուած հայրենիքը պահող հայրենասէրին վայել դպրոցի մէջ:

Թամարա Գրիգորեան, «Հայրենասէր» կազմակերպութիւն

Scroll Up