«Սեւանայ լիճը շատ կը նմանի Վանայ լիճին». Վանի համաքաղաքապետ

Այս օրերուն ընթացող Համահայկական ամառնային 6-րդ խաղերու բացման արարողութեան մասնակցելու նպատակով Թուրքիայէն Հայաստան ժամանած պատուաւոր հիւրերու կազմին մէջ կը գտնուի նաեւ Վանի համաքաղաքապետ Հաթիճէ Չօպան: Օգտուելով առիթէն` անոր հետ զրուցեցինք Հայաստանէն ստացած տպաւորութիւններուն եւ հայ-քրտական առնչութիւններուն շուրջ:

Վանի համաքաղաքապետ Հաթիճէ Չօպան մեզի հետ զրոյցին նշեց, որ առաջին անգամ կը գտնուի Հայաստանի մէջ: Ազգութեամբ քիւրտ եւ հաւատքով ալեւի եղող Հաթիճէ Չօպանի մայրը տերսիմցի է, հայրը` մարաշցի:

Վանի համաքաղաքապետը յայտնեց, որ Վանի պատուիրակութիւնը 4 հոգինոց է: Համահայկական ամառնային 6-րդ խաղերու բացման արարողութեան մասնակցելու անոնց որոշումը պայմանաւորուած է հայ-քրտական բարեկամութիւնը ամրապնդելու ցանկութեամբ:

Հաթիճէ Չօպան շեշտեց, որ հայերու ճակատագիրին նմանող ճակատագիր  Թուրքիոյ մէջ ունեցած են եւ կը շարունակեն ունենալ նաեւ քիւրտերը, որուն հետեւանքով կը հասկնան ու կը կիսեն հայերու ցաւը:

Անդրադառնալով նաեւ Վանայ լիճի գանձին` Աղթամար կղզիի Սուրբ Խաչ եկեղեցւոյ, Վանի համաքաղաքապետը ընդգծեց` խիստ կարեւոր է, որ այն այցելող հայերը, զգալով իրենց պատկանելութիւնը այդ հողերուն, պահպանեն այդ զգացումն ու հայկական ոգին:

«Ես կը կարծեմ, որ քիւրտերու եւ հայերու պատմութիւնները մեծ նմանութիւններ ունին, եւ անոնք պէտք է ամրապնդեն իրենց կապերը: Ինքս հայերուն եղբայր կը համարեմ: Նաեւ կը կարծեմ, որ մենք` քիւրտերս, պարտական ենք անոնց, քանի որ հայերու գլխուն եկածներու գործին մէջ  մասնաբաժին  ունեցած են նաեւ մեր պապերը»,- նշեց Հաթիճէ Չօպան:

Մեր երկիր առաջին անգամ այցելած Վանի համաքաղաքապետը շեշտելով, թէ Երեւանը գեղեցկութեամբ գերազանցած է իր ակնկալիքները, ընդգծեց նաեւ, որ Հայաստան շատ տպաւորիչ երկիր է, իսկ Սեւանայ լիճը շատ նման է Վանայ լիճին:

Մելինէ Անումեան
Akunq.net

Scroll Up