«Սփիւռք Ամառնային Դպրոց» Եւ «Արի Տուն» Ծրագիրի Մասնակիցները Հիւրընկալեցին ՀՀ Վարչապետը

Յուլիս 19-ին Աղաւնաձորի §Արի տուն» ճամբարին մէջ տեղի ունեցաւ ՀՀ սփիւռքի նախարարութեան` Սփիւռքի երիտասարդներու §Արի տուն» հայրենաճանաչութեան ծրագիրի երրորդ փուլի հանդիսաւոր փակման արարողութիւնը, որուն ներկայ էին ՀՀ վարչապետ Տիգրան Սարգսեան, ՀՀ սփիւռքի նախարար Հրանոյշ Յակոբեան, Կոտայքի մարզպետ Կովալենկօ Շահգալդեան: Ձեռնարկին կը մասնակցէին նաեւ ՀՀ սփիւռքի նախարարութեան §Սփիւռք ամառնային դպրոց» ծրագիրի հայոց լեզուի արագացուած դասընթացներու եւ ուսուցիչներու վերապատրաստման դասընթացներու մասնակիցները ինչպէս նաեւ դասաւանդող ուսուցիչներ:

Սփիւռքէն ժամանած երիտասարդներուն եւ ամառնային դպրոցի մասնակիցներուն ողջունեց ՀՀ վարչապետ Տիգրան Սարգսեան. §Մեր նպատակն է, որ դուք ողջ կեանքում կապուած լինէք Հայրենիքի հետ: Լիայոյս ենք, որ ձեզանից շատերը կը վերադառնան եւ կը հաստատուեն Հայրենիքում: Այս ճանապարհին դուք արել էք առաջին քայլը` գալով եւ սովորելով մայրենի լեզուն, ինչը ՀՀ կառավարութիւնն առաջնային խնդիր է համարում: Պատահական չէ, որ Հանրապետութեան Նախագահի առաջին քաղաքական նախաձեռնութիւնը ՀՀ սփիւռքի նախարարութեան ստեղծումն էր, որը զբաղուելու է Սփիւռքի հայապահպանութեան խնդիրներով»: Հանրապետութեան վարչապետը շնորհակալութիւն յայտնեց ուսուցիչներուն` սփիւռքահայերուն մայրենիի դասաւանդման գործին մէջ առաւելագոյն ջանքեր ներդնելու համար:

Նախարար Հրանոյշ Յակոբեան եւս շեշտեց, որ ուծացման դէմ պայքարի գլխաւոր զէնքը մայրենիի ուսուցումն է եւ յոյս յայտնեց, որ երիտասարդները իրենց բնակութեան երկիրներ պիտի մեկնին դարձեալ Հայրենիք վերադառնալու ակնկալիքով:

§Սփիւռք ամառնային դպրոց» ծրագիրի հայոց լեզուի ուսուցչուհի` Սորպոնի համալսարանի փրոֆէսոր Հիլտա Գալֆայեան–Փանոսեան, շնորհակալութիւն յայտնեց ՀՀ կառավարութեան` հայապահպանութեան, սփիւռքահայերուն հայեցի կրթելուն ուղղուած այս կարեւոր ծրագիրին համար:

Ներկաներուն իր օրհնութիւնը բերաւ Երուսաղէմի Հայոց Պատրիարքութեան Սրբոց Յակոբեանց միաբանութեան անդամ Հոգեշնորհ Տէր Տիրան աբեղայ Յակոբեան:

Սփիւռքահայ երիտասարդները հանդէս եկան հայրենասիրական ստեղծագործութիւններու կատարումներով:

Ձեռնարկը ամփոփուեցաւ աւանդական խարոյկի շուրջ, ուր մինչեւ ուշ երեկոյ երգեցին եւ պարեցին ծրագիրի մասնակիցները:

Scroll Up