Մեկնարկեց §Հայոց Ցեղասպանութեան 100-րդ Տարելիցին Ընդառաջ» Խորագիրով Իրաւաբաններու Համահայկական Երկրորդ Համաժողովը

Յուլիս 5-ին ՀՀ ԳԱԱ նախագահութեան նիստերու դահլիճին մէջ մեկնարկեց ՀՀ սփիւռքի նախարարութեան եւ Իրաւաբաններու համահայկական խորհրդաժողովի կողմէ կազմակերպուած իրաւաբաններու համահայկական երկրորդ համաժողովը, որուն կը մասնակցին մօտ 100 անուանի իրաւաբաններ Հայաստանէն, Սփիւռքէն եւ Արցախէն:

ՀՀ սփիւռքի նախարար Հրանոյշ Յակոբեան համաժողովին ներկայացուց ՀՀ Նախագահ Սերժ Սարգսեանի ուղերձը, ուր մասնաւորապէս ըսուած էր. §Բնաւ պատահական չէ, որ հայ իրաւաբանների ուշադրութեան կենտրոնում են Հայոց ցեղասպանութեան իրաւական հիմնախնդիրները: Դուք տեսական եւ գործնական մասնակցութիւն էք ունենում դրա միջազգային ճանաչման գործընթացներին: Գնահատելի են ձեր ջանքերը տարբեր երկրների պետական եւ քաղաքական կառոյցների ուշադրութիւնը Հայոց ցեղասպանութեան 100-րդ տարելիցին բեւեռելու եւ ճշմարտութիւնը համայն աշխարհին ներկայացնելու ուղղութեամբ` նպաստելով աշխարհի որեւէ կէտում ցեղասպանութեան ահաւոր ոճիրի կրկնութեան կանխարգելմանը»:

Ողջունելով համաժողովի մասնակիցներուն ՀՀ սփիւռքի նախարար Հրանոյշ Յակոբեան մասնաւորապէս ըսաւ. §Հայոց ցեղասպանութեան 100-րդ տարելիցին ընդառաջ չափազանց կարեւոր է ոչ միայն մեր պայքարին նոր թափ հաղորդելը, այլեւ այն առաւել կազմակերպուած եւ գիտական հիմքերի վրայ դնելը: Ցեղասպանութիւնից անցել է շուրջ 100 տարի, մնացել են ցեղասպանութեան վէրքերն ու հետեւանքները, սակայն, ի հեճուկս ցեղասպանութիւն գործած Թուրքիայի, հայ ժողովուրդն այսօր կայ, ունի երկու պետութիւն եւ հզօր Սփիւռք, ուստի պատմական արդարութեան վերականգնման ուղղուած մեր պայքարը դեռ առջեւում է»:

Ողջոյնի խօսքով հանդէս եկան նաեւ ՀՀ սահմանադրական դատարանի նախագահ Գագիկ Յարութիւնեանը,  ՀՀ արդարադատութեան նախարար Հրայր Թովմասեանը, ՀՀ գլխաւոր դատախազ Աղուան Յովսէփեանը, ՄԻԵԴ-ի դատաւոր Ալուինա Կիւլումեանը, Մարդու իրաւունքներու պաշտպան Կարէն Անդրէասեանը, ԼՂՀ արդարադատութեան նախարար Արարատ Դանիէլեանը: Շնորհաւորելով համաժողովի մասնակիցներուն ՀՀ Սահմանադրութեան օրուան առթիւ` բանախօսները կարեւոր համարեցին Հայոց ցեղասպանութեան ճանաչման գործին մէջ յետագայ ընելիքները իրաւական հարթութեան վրայ: Միջազգային մարտահրաւէրներուն դիմակայելու համար կարեւոր համարուեցաւ միջազգային իրաւունքի երիտասարդ մասնագէտներու պատրաստումը, որոնք պիտի  ներկայացնեն հարցի իրաւական քննարկումը միջազգային ատեաններու մէջ: Համաժողովը նոր խթան կը հանդիսանայ §Ցեղասպանութեան 100-րդ տարելիցին ընդառաջ» ստեղծուած պետական յանձնաժողովի եւ Սփիւռքի մէջ գործող տարածաշրջանային յանձնաժողովներու առաւել արդիւնաւէտ գործունէութեան համար:

§Հայոց ցեղասպանութեան միջազգային ճանաչման գործընթացքը եւ միջազգային իրաւական միտքը» թեմայով նիստին ընթացքին քննարկուեցան միջազգային ատեաններու մէջ Հայ Դատի իրաւական լուծման հարցը բարձրացնելու նպատակայարմարութեան, պահանջատիրութեան ձեւակերպման, համարժէք գոյքային եւ տարածքային փոխհատուցման, հետեւանքներու վերացման եւ այլ հարցեր: Իրաւաբանները անդրադարձան նաեւ Սեւրի եւ Կարսի միջազգային պայմանագիրներու իրաւական հետեւանքներուն, մարդու իրաւունքներու ոլորտին մէջ որպէս առաջին միջազգային պայմանագիր Ժընեւեան համաձայնութեան յետադարձ ուժի կիրառման, պետական յանցագործութիւններու հանդէպ միջազգային իրաւայաջորդութեան հետ կապուած հիմնախնդիրներուն:

Համաժողովի ծիրէն ներս Հայաստանի ազգային պատկերասրահին մէջ տեղի ունեցաւ §Նոր հազարամեակի սահմանադրականութիւնը. Իրականութեան պարադիգմները եւ մարտահրաւէրները» գիրքի շնորհանդէսը: Համաժողովի մասնակիցները այցելեցին Ծիծեռնակաբերդ` Հայոց ցեղասպանութեան զոհերու յուշահամալիր:

Համաժողովը իր աշխատանքները պիտի շարունակէ յուլիս 6-ին:

Scroll Up