Հայերը պատմութեան մէկ մասն են` համաձայնի Անգարան, թէ ոչ. Իտալական մամուլ

Հայոց ցեղասպանութեան ճանաչման հարցին մէջ չար հերոսը, ինչպէս միշտ, Անգարան կը մնայ:

Արցախփրէսի փոխանցմամբ` այս մասին Հայաստան կատարած այցէն յետոյ իտալական Gazzetta di Mantova թերթին մէջ կը  գրէ Եւրոխորհրդարանի` արտաքին յարաբերութիւններու յանձնաժողովի խորհրդական Փաոլօ Պերգամասկը: Յօդուածին մէջ ըսուած է. «Եւրոպայի մէջ շատերը, յատկապէս ծայրայեղ աջակողմեան շարժման ներկայացուցիչները, որեւէ հնարաւորութեան պարագային կը ժխտեն ակնյայտ փաստերը կամ կը փորձեն անյաջող կերով աղաւաղել պատմութիւնը:

Հայաստանի քաղաքացիական հասարակութեան հեղինակաւոր ներկայացուցիչ Ռիչարտ Կիրակոսեան կը կարծէ, որ հաշտեցման առաջին քայլը պէտք է դառնայ Երեւանի եւ Անգարայի յարաբերութիւններու կարգաւորումը` ատոր յաջորդող սահմաններու բացմամբ եւ դիւանագիտական  յարաբերութիւններու հաստատմամբ:  Սակայն Թուրքիան կը շարունակէ խուսափիլ 2008թ. Երեւանի մէջ 2 երկիրներու նախագահներու պատմական հանդիպումէն ետք  Հայաստանի հետ միասին ստանձնած իր պարտաւորութիւններու կատարումէն:

«Այդ վէրքը բուժելը Անգարայի շահերէն կը բխի»,- նշած է Կիրակոսեան` աւելցնելով, որ փակ սահմանը կը խանգարէ Թուրքիոյ հիւսիս-արեւելեան շրջաններու տնտեսական զարգացման:

Ցեղասպանութեան շուրջ քննարկումը կը վկայէ այն մասին, որ միջազգային հանրութիւնը ի վիճակի չէ եղած դասեր քաղել պատմութենէն:

… Հեռու հորիզոնին վրայ` օդակայանի ապակիէ պատուհանէն այն կողմ, ամպերու մէջէն կ’երեւի Մեծ եւ փոքր Մասիսներու ձիւնածածակ գագաթները: Անոնք մօտ են, սակայն մէջտեղը կանգնած է ամուր փակած սահմանը, որմէ այն կողմ ազգի մը մէկ հատուածն է, որ չի կրնար եւ պէտք չէ վերանայ: Քանի որ ան մարդկութեան պատմութեան մէկ  մասն է, համաձայնի  Անգարան, թէ ոչ»:

Scroll Up