Հայաստանի եւ ԼՂՀ ԱԺ պետական իրաւական հարցերու յանձնաժողովները հանդէս  եկած են համատեղ յայտարարութեամբ:

«Ատրպէյճանի կողմից Արցախի դէմ լայնածաւալ ռազմական գործողութիւնների իրականացման հետեւանքով մարդկութեան դէմ կատարած յանցագործութիւնների վերաբերեալ 2016 թուականի Ապրիլի 2-5-ը, կոպտօրէն խախտելով 1994թ. Մայիսին ստորագրուած զինադադարի մասին եռակողմ համաձայնագիրը (Արցախի, Ատրպէյճանի եւ Հայաստանի միջեւ), Ատրպէյճանը բացայայտ ոտնահարել է միջազգային իրաւունքի նորմերը` պատերազմ վարելու արգելուած միջոցների եւ մեթոդների կիրառմամբ:

Յարձակման հիմնական թիրախ է դարձել սահամանամերձ եւ խորը թիկունքում գտնուող քաղաքացիական բնակչութիւնը: Ատրպէյճանական բանակն իր զինանոցում գտնուող բազմաթիւ զինատեսակներից («ՄՄ-21» (Կրատ) եւ համազարկային կրակի «Սմերչ» ռէակտիւ համակարգ, ամենատարբեր տրամաչափի հրետանային միջոցներ (այդ թւում` 152մմ հրանօթներ), ծանր հրետանային «ՏՈՍ-1» համակարգ, ՄԻ-24 գրոհային ուղղաթիռներ, տանկեր ու այլ կարգի զրահատեխնիկա, գրոհային անօդաչու թռչող սարքեր) հրթիռա-հրետակոծման է ենթարկել ԼՂՀ մի շարք բնակավայրեր, որի հետեւանքով զոհուել ու վիրաւորուել են խաղաղ բնակիչներ, այդ թւում երեխաներ, կանայք եւ ծերեր:

Անվտանգութեան խնդիրներից ելնելով տարհանուել են Թալիշ, Մատաղիս, Մարտակերտ բնակավայրերի խաղաղ բնակիչները: Ատրպէյճանական բանակի կողմից Արցախի խաղաղ բնակչութեան դէմ կատարուած վայրագութիւնների ու անմարդկային բռնարարքների ապացոյցները բազմաթիւ են: Բոլոր հիմքերը կան ենթադրելու, որ ատրպէյճանական բանակի կազմում ներգրաւուած են եղել վարձկան ահաբեկիչներ:

Արցախի Հանրապետութեան դէմ Ատրպէյճանի իրականացրած ագրեսիան խաղաղութեան եւ մարդկութեան դէմ ուղղուած միջազգային յանցագործութիւն է: Ատրպէյճանական ագրեսիայից Արցախի խաղաղ բնակչութեանը պաշտպանելու հարուածն այդ նոյն օրերին իր վրայ է վերցրել ԼՂՀ Պաշտպանութեան բանակը, որն իր տրամադրութեան տակ գտնուող անհրաժեշտ միջոցներով կասեցրել է հակառակորդի ռազմական լայնածաւալ յարձակումը` արժանապատուօրէն կատարելով սեփական ժողովրդի անվտանգութեան երաշխաւորի իր դերը:

ԼՂՀ եւ ՀՀ խորհրդարանների պետական-իրաւական հարցերի մշտական յանձնաժողովները յայտարարում են, որ վճռական են տրամադրուած վերոնշեալ բոլոր յանցագործութիւնները, Ատրպէյճանի ագրեսիայի հետեւանքներն ուսումնասիրելու եւ դրանց արդիւնքներն, ընդունուած կարգով, միջազգային հանրութեանը ներկայացնելու համար»,- Հայերն այսօրի փոխանցմամբ` ըսուած է յայտարարութեան մէջ: