Աշնանային մթնշաղ երեկո էր: Ս.Աննե գիմնազիայի սաների երաժշտական քառյակը հնչեցրեց Հայաստանի օրհներգը, որի ներքո Դանիայում Հայաստանի Հանրապետության արտակարգ և լիազոր դեսպան Հրաչյա Աղաջանյանը վեր բարցրացրեց հայկական եռագույն դրոշը: Դրոշը ծովի մեղմիկ քամու ազդեցությամբ ծածանվեց ջինջ ու պարզ երկնքի տակ՝ կարծես շշուկով ասելով՝ ապա՜, մի ինձ նայեք: Ներքևում կանգնածները, կարծես լսելով շշուկը, հայացքները հառեցին դեպի վեր՝ տեսնելու դրոշի մեղմիկ նաիրյան շարժը և մեկընդմեջ փոխվող հրաշալի գույները: Քիչ անց միկրոֆոնից հնչած ձայնը գրավեց բոլորի ուշադրությունը:

Ելույթով հանդես եկան հարգարժան դեսպանը, Արտաքին գործերի նախարար Էդվարդ Նալբանդյանը և Եվրոպական հարցերով նախարար Նիկոլաի Վամմենը: Ելույթից հետո կարմիր ժապավենը կտրեցին նախարարները, և դեսպանատունը բացեց իր դռները հայ և դանիացի հարյուրից ավելի հյուրերի առջև: Մեծ հիացմունքով և ներքին հուզմունքով ոտք դրեցինք կարծես մեզ շատ հարազատ մի օջախ: Վաղուց սպասված փոքրիկ Հայաստան՝ Դանիայի թագավորությունում:

Դեսպանատանը հյուրերին ընդունեցին բարի գալուստի ըմպելիքով և փոքրիկ ուտեստներով: Ըստ հայկական սովորության՝ սեղանին դրված էր բոլորին քաջ հայտնի հայկական կոնյակը: Հյուրերից ոմանք միայն լսել էին հայկական կոնյակի մասին, սակայն բախտ չեր վիճակվել համտեսել այն: Այստեղ հյուրերը հնարավորություն ունեցան համտեսելու և վայելելու նաև մեր հայկական անուշահոտ կոնյակը: Բոլորի դեմքին արտացոլված էր գոհունակության և երջանության զգացումը: Ներկաները այնպիսի ջերմ զրույցի էին բռնկվել միմյանց հետ, որ մոռացել էին անգամ արարողության սահմանված ժամանակահատվածի մասին:

Քիչ անց հնչեց հայկական հարազատ երաժշտությունը, որի տակ անհնարին էր պարային մի շարժում չկատարել: «Ահա և հայկական երաժշտությունը, դե արի՛ ու մի պարի՛»,- ասաց ներկա հյուրերից մեկը, մյուսն էլ ավելացրեց. «Մի հատ Քոչարի, շուրջպար չբռնենք՞ ու թռնենք»: Դա նշան էր կարոտի, կարոտ հարազատների, կարոտ հայկական ազգային պարերի, և վերջապես կարոտ հարազատ երկրի: Հուսանք, որ դեսպանատան այս ջերմ մթնոլորտը կլինի շարունակական և կստեղծի համագործակցության նորանոր ուղիներ՝ կստորագրվեն պայմանագրեր, կիրագործվեն նախագծեր, որոնք էլ ավելի կնպաստեն Հայաստանի և Դանիայի բարեկամական կապերի ամրապնդմանը:

Աննա Կարապետյան