Արևմտահայերեն
Русский
English«Հայապահպանության հիմնախնդիրներ» խորագրով քննարկվելիք թեման համաժողովի առաջնահերթ նյութերից մեկն է. Հարություն Սելիմյան
Սեպտեմբեր 18-20 Երևանում կայանալիք «Փոխադարձ վստահություն, միասնականություն և պատասխանատվություն» խորագրով Հայաստան-Սփյուռք համահայկական 6-րդ համաժողովին ընդառաջ ներկայացնում ենք «Հայերն այսօր»–ի հարցազրույցը Սիրիայի Հայ ավետարանական համայնքի համայնքապետ, վերապատվելի Հարություն Սելիմյանի հետ:
– Ձեր կարծիքով, ո՞րն է սեպտեմբերին կայանալիք Հայաստան–Սփյուռք համահայկական 6 րդ համաժողովի առաջնահերթությունը:
– Յուրաքանչյուր թեմա, որը պիտի քննարկվի Հայաստան-Սփյուռք համահայկական 6-րդ համաժողովին, ունի իր համազգային առաջնահերթությունը: Սակայն նկատի ունենալով վերջին վեց տարիներին ընթացող Սիրիայի պատերազմի հետևանքով առաջացած դժվարություններն ու մարտահրավերները` «Հայապահպանության հիմնախնդիրներ» ուղղության ներքո քննարկվելիք թեման համաժողովի առաջնահերթ, հետապնդելի նյութերից մեկն է:
–Համաժողովի չորս թեմատիկ նիստերում (Հայաստանի զարգացման հիմնախնդիրներ, ՀՀ պաշտպանական քաղաքականության առանձնահատկությունները ժամանակակից մարտահրավերների պայմաններում, Արտաքին քաղաքականության օրակարգ, Հայապահպանության հիմնախնդիրներ) ի՞նչ հարցեր կցանկանայիք քննարկվեին:
– Ընդհանրապես կնախընտրեմ քննարկումներ կատարել և վերլուծել հայապահպանության հիմնախնդիրները, այսպես` Սիրիայի պատերազմի վերջին վեց տարիների ընթացքում սիրիահայերի դիմագրաված հետևյալ մարտահրավերները.
-արտագաղթ
-հայապահմանման և մայրենի լեզվի պահպանման դժվարություն
-պատերազմի առաջացրած տնտեսական տագնապներ
-պատերազմի սպառնացող վտանգներ:
– Որո՞նք են այն կարևոր նախադրյալները, որոնց միջոցով Սփյուռքում հնարավոր է հայապահպանությանն ուղղված աշխատանքներ իրականացնել` հատկապես երիտասարդների շրջանակում:
– Սփյուռքում հայապահպանության հիմնական կռվաններն են` եկեղեցին, դպրոցն ու ակումբը:
Ստորև կներկայացնեմ այն նախադրյալները, որոնց միջոցով Սփյուռքում հնարավոր կլինի իրականացնել հայապահպանությանն ուղղված աշխատանքները.
1.Երիտասարդներին ներգրավել ու մղել դեպի ազգային կյանք, գիտակ դարձնել հայ մշակույթը պահպանող արժեքներին:
2.Երիտասարդներին հաղորդակից դարձնել հայկական ծրագրերին:
- Համակարգված ու միացյալ աշխատանք տանել՝ միջ-հարանվանական ձեռնարկներ կազմակերպելով:
- Սեմինարների կամ հավաքական զրույցների միջոցով բացահայտել երիտասարդների հետաքրքրությունները, պահանջներն ու ակնկալիքները և պատրաստել այն բնագավառները, որտեղ աշխատելու և արդյունաբերելու լայն հնարավորություն կունենան:
- Կարևորել մամուլի դերը Սփյուռքի հայապահպանության շրջանակում:
- Սփյուռքի հզորացման համար միջ-հարանվանական համագործակցությունը հիմնական ազդակն է:
- Հայապահպանության առումով եկեղեցին, դպրոցները և հատկապես ընտանիքները մեծ դերակատարություն ունեն սերունդների՝ առողջ և հայեցի կրթություն տալու վեհ ու ազնիվ գործում:
- Նկատի ունենալով, որ երիտասարդներն են համացանցի հիմնական ընթերցողները, հետևաբար տեղեկատվական և սոցիալական հաղորդակցության ցանցերում կարևորել ազգային ինքնությունը պահպանող ազդակների մասին հոդվածների և այլ դաստիարակիչ նյութերի հրատարակումը:
– Ի՞նչ ակնկալիքներ ունեք համաժողովից:
– Ակնկալություններս բավականին բարձր են: Լիահույս եմ, որ այս համաժողովի քննարկումները պիտի սատարեն հայապահպանության հիմնախնդիրների վերլուծման, Հայոց ցեղասպանության միջազգային Ճանաչման, դատապարտման և հետևանքների վերացման գործընթացին, ինչպես նաև համազգային առաջնահերթությունների վերանայման, լրացման և Հայրենիք–Սփյուռք գործակցության հեռանկարներին:
