«Պարզապես հայուհի մը եմ» խորագիրը կրող միջոցառում՝ նվիրված Սրբուհի Տյուսաբի 175-ամյակին
Նոյեմբերի 22-ին Սյունիքի մարզի Եղեգի միջնակարգ դպրոցում տեղի ունեցավ «Պարզապես հայուհի մը եմ» խորագիրը կրող միջոցառում՝ նվիրված հայ առաջին վիպասանուհի, արևմտահայ գրող, հրապարակախոս և հասարակական-մանկավարժական գործիչ (Սրբուհի Վահանյան) Սրբուհի Տյուսաբի 175-ամյակին, տեղեկացնում է «Հայերն այսօր»-ը:
Հայոց լեզվի և գրականության ուսուցչուհիներ Մ. Կոստանյանն ու Մ. Ադամյանը ներկայացրեցին Ս. Տյուսաբին՝ որպես «հայ գրականության նահապետուհի», «հայ ֆեմինիզմի ավանգարդ»՝ կարևորելով նրա անուրանալի ներդրումը մեր հասարակական կյանքում: Այնուհետև աշակերտներն անդրադարձան Տյուսաբի կյանքի և ստեղծագործության ուշագրավ դրվագներին՝ զուգահեռ դիտելով սալիկահանդես, իսկ մյուսները հանդես եկան նրա երեք՝ «Մայտա», «Սիրանույշ», «Արաքսիա կամ վարժուհին» վեպերի գաղափարական վերլուծություններով:
Միջոցառման ավարտին Մ. Կոստանյանը բարձրաձայնեց հայ իրականության մեջ կանանց իրավունքների առաջին գաղափարախոսներից Ս. Տյուսաբի արծարծած մտքերը՝ նշելով,որ չնայած ժամանակակիցները, ի նշան երախտագիտության, նրան պսակում էին «ազգասեր» մակդիրով, բայց ինքն ավելի համեստ տեղ էր տալիս իրեն. « Պարզապես հայուհի մը եմ, որ հօգուտ ազգին կաշխատիմ դույզն-ինչ, ինչպես կաշխատին մյուս հայուհիները…»:
Հիշեցնենք, որ Սրբուհի Տյուսաբն ընդգրկված է ՀՀ սփյուռքի նախարարության «Մեր մեծերը-2016» ծրագրում: