Ջուրը Հալէպի Հայահոծ Շրջաններուն Մէջ Հազարաւոր Բնակիչներու Մատակարարուեցաւ

Երբ հալէպցիք ականատես կը դառնան աշխարհի ամէնէն վտանգաւոր պատերազմներէն մէկուն եւ ամիսներէ ի վեր եւ ամէն քայլափոխի տեսանելի են կռիւ, ներքին պատերազմ, արիւն, վէրք, անօթութիւն, սով, ջուրի եւ լոյսի կարօտ, մահ եւ սուգ, ահաւասիկ անոնք անգամ մը եւս ջուրի կարօտ պիտի մնային:

«Բերիոյ նիուզ» կը հաղորդէ, Հալէպի մէջ ջուրի երկարատեւ անջատումի պատճառով շաբաթ օր եւ երէկ ջրամատակարարում կատարուեցաւ հայաշատ շրջաններու մէջ՝ Վիլլաներ, Նոր Գիւղ, Աուժեթ Ժըպ եւ Սիւլէյմանիէի հայկական ակումբներէ, կեդրոններէ եւ եկեղեցիներէ:

Շրջաններու հազարաւոր բնակիչներ կարգ ու կանոնը առանց խախտելու ստացան իրենց տրամադրուած ջուրը: Անհրաժեշտ է նշել, որ ջրամատակարարումը տեղի ունեցաւ անվճար:

Հալէպի Մէջ Ջուրի Բնականոն Մատակարարումը
Աստիճանաբար Կը Վերականգնի

«Բերիոյ նիուզ» երէկ աւելի ուշ Հալէպի մէջ առկայ ջուրի եւ ելեկտրականութեան լուրջ խնդիրին առնչութեամբ հաղորդեց, որ կառավարութիւնը կարելին կ՛ընէ կացութիւնը բնականոն վիճակին վերադարձնելու: Ջրամատակարարումը թէեւ ոչ ամբողջովին, սակայն աստիճանաբար կը վերականգնի, իսկ ելեկտրականութիւնը տակաւին կը մնայ խզուած:

http://www.aztagdaily.com

Scroll Up