Դիարբեքիրում ապրող Շահե Թայուրաքը, ըստ ենթադրությունների, 115 տարեկան է: Ունի 415 թոռ, ծոռ ու կոռ: Շահեն ամուսնացած է եղել 3 անգամ:

Թուքական «Memurlar» լրատվական կայքի տեղեկացմամբ` նրա առաջին ամուսինը հայ է եղել: Առաջին ամուսնությունից երկու զավակ է ունեցել:

Նրա փոքր որդին՝ Ջեմալ Թայուրաքը, որն արդեն 60 տարեկան է, ասում է, որ արդեն թոռների հաշիվը կորցրել են. «Երեք տարի առաջ 415 թոռ ուներ, իսկ այժմ չգիտեմ, թե քանիսն են: Հստակ թիվը ճշտելու համար, ինչպես երկու տարի առաջ, հիմա էլ պիտի բոլոր եղբայրներիս, քույրերիս, զարմիկներիս ու թոռներին հավաքեմ ու նորից ցուցակագրեմ: Բայց մի բան հաստատ կարող եմ ասել, այս 3 տարվա ընթացքում 15 թոռ է լույս աշխարհ եկել և թոռների թիվը 430-ից անցել է»:

Շահեի ավագ դուստրը՝ 90-ամյա Թելին, մոր մասին շատ քիչ հիշողություններ ունի, քանի որ իրեն ու եղբորը մեծացրել է տատիկը (մորական տատիկը՝ խմբ.): «Մենք գիտեինք, թե մեր տատիկը մեր մայրն է: Երբ 6 տարեկան էի, տատիկս ասաց, որ մեր իսկական մայրը ամուսնացել է մոտիկ գյուղերից մեկում»:

Թելին պատմել է, որ իրենց հայրը աքսորից փրկված իսլամացված հայ է եղել, որի անունը Իբրահիմ էր: Մոր և հոր ամուսնության մասին պատմելիս՝ նա նշել է, որ դա եղել է տատիկի որոշումը. «Պապիկս (մորական) 7 տարի էր՝ ծառայում էր Արաբիայում: Երբ արդեն իրենց խնամող չի եղել, տատիկս մորս ամուսնացրել է հարևան գյուղում ապրող հորս հետ, որը որբ էր, ոչ մի բարեկամ չուներ»:

Թելին պատմել է, որ հայրը իսմացած հայ է եղել, իսկ հորական կողմի բարեկամները, որոնք ապրում էին Սիրիայի Քամիշլի քաղաքում, տարիներ հետո գտել ու կապ են հաստատել իրենց հետ:

«Տարիներ առաջ նրանք կապ էին հաստատել եղբորս հետ: Եղբայրս ինձ պատմել է, որ մեր հոր զարմիկները մեզ Սիրիա են հրավիրել: Պետք է գնայինք նրանց հետ ծանոթանայինք, բայց ոչ մի կերպ չստացվեց»,-ermenihaber.am-ի փոխանցմամբ՝ հայտնել է Թելին՝ նշելով, որ շատ է ափսոսում, որ չի կարողացել ծանոթանալ նրանց հետ: