Յուրաքանչյուր մշակույթ ունի ապագա, եթե ապրում և անընդհատ շնչում է,և ունի միջազգային հետաքրքրություն, եթե համամարդկային արժեքէ: Հայկական երաժշտությունը խորունկ է և համամարդկային, և կարող է հանդիսանալ հինավուրց քաղաքակրթությունների ընկալման կարևոր բանալիներից մեկը:

Վերջերս հայության համար կարևոր իրադարձություններից մեկն է աշխարհի ամենահեղինակավոր ընկերություններից մեկի՝Գերմանական ECMrecords-ի կողմից հրատարակված «Կոմիտաս» ձայնասկավառակը՝ իր  30  էջանոց  բազմաբովանդակ տեղեկատվությամբ  և  լուսանկարներով: Ձայնասկավառակի տեքստը գրվել է կոմպոզիտոր Տիգրան Մանսուրյանի և Լևոն Իսկենյանի կողմից:

Ձայնասկավառակը  հրաշալի  հնարավորություն  և  առիթ  է Կոմիտասի  երաժշտությունը Արևմուտքում  բացահայտելու և տարածելու համար: Այն կարող է լինել ամբողջ հայության համար հայ երաժշտությանը գիտակից ծանոթացումն ու երիտասարդ սերնդին հպարտությամբ դաստիարակելու հիմքերից մեկը:

Սա մինչև օրս միջազգային  ամենամեծ  ու  լայն  անդրադարձներից մեկն է Կոմիտասի  երաժշտությանը: Հարկ է նշել, որ ECMrecords-ը,  լինելով  աշխարհում  շատ  հայտնի  և  մեծ  հեղինակություն ունեցող ընկերություն, օգտագործում է աշխարհով մեկ ունեցած  իր բոլոր լծակները` նպաստելով իր հրատարակած ծրագրերի ճանաչելիությանը: Այն  նաև ապահովում  է  զանգվածային  լրատվամիջոցների  ու  երաժշտական  փառատոների  անդրադարձը:

Ձայնասկավառակի մեջ տեղ են գտել Արևմտյան և Արևելյան Հայաստանի տարածքներում գրի առնված և, մի քանի հազար տարվա ընթացքում ստեղծված հայկական խմբապարերի երաժշտությունները, ինչպես օրինակ՝«Կարնո հետ ու առաջը», «Կարնո շորորը», «Մշո շորորը», Կանացի մենապարերը, Մանկական նվագները, օրորոցային, ժողովրդական և հոգևոր երգերի կատարումներ: Բոլոր ստեղծագործությունները գործիքավորվել են հայկական նվագարաններով՝դուդուկ, փող, թառ, դափ, քամանչա, թմբուկ, զուռնա, բուրվառ, զանգ և այլն:

Կոմիտասի ստեղծագործությունների գործիքավորումները կատարել է համույթի  գեղարվեստական  ղեկավար Լևոն Իսկենյանը`որպես գործերի սկզբնաղբյուր  օգտագործելով  այն  ժողովրդական  նվագարանները,  որոնց  մասին  որպես կատարողական ոճ և սկզբնաղբյուր  յուրաքանչյուր  ստեղծագործության  վրա  նշել է Կոմիտասը`թառ, դուդուկ, փող, դափ, թմբուկ, զուռնա և այլն:

Շատ կարճ ժամանակահատվածում ձայնասկավառակը արժանացել է միջազգային՝այդ թվում եվրոպական, ամերիկյան, ճապոնական լրատվամիջոցների բարձր գնահատականին` բնութագրվելով հետևյալ կերպ. «Համույթը նոր շունչ է տալիս հայկական երաժշտությանը, որը հավաքագրվելէ 20-րդ դարաշրջանի սկզբում, սա երաժշտական հնագիտական և վերականգնման աշխատանք է»:

Անգլիական “Songlines magazine”-ի կողմից ձայնասկավառակը դասվել է 2015 թվականի տասը  լավագույն ձայնասկավառակների շարքում:

Այն արդեն հասանելի է աշխարհի գրեթե բոլոր երկրների ձայնասկավառակների վաճառակետերում, ինչպես նաև առցանց վաճառակետերում:

ECM 2451

Komitas -The Gurdjieff Ensemble- levon Eskenian

Կարճամետրաժ  տեսահոլովակ «Կոմիտաս»ձայնասկավառակի մասին.

Կարճամետրաժ ֆիլմ ծրագրի մասին.

«Գուրջիև» համույթը միջազգային համբավ ունեցող հայկական ամենահայտնի համույթներից մեկնէ, որը հիմնադրվել է 2008 թվականին Լևոն Իսկենյանի կողմից՝ նպատակ ունենալով ներկայացնել հայկական ավանդական երաժշտությունը և հայ մեծանուն փիլիսոփա, երաժիշտ Գ.Ի. Գյուրջիևի և մեծնԿոմիտասի ստեղծագործություններն ու գործիքավորումները: համույթի կազմում Հայաստանի առաջատար երաժիշտներ են:

Գերմանական հայտնի ECM ձայնագրման ընկերությունը թողարկել է նաև «Գուրջիև» համույթի առաջին ձայնասկավառակը՝«Music of Georges I .Gurdjieff» , որը 2012 թ.-ին Նիդերլանդներում արժանացել է հեղինակավոր Edison մրցանակին, Հայաստանի ազգային երաժշտական մրցանակին, ինչպես նաև խոշոր ռադիոկայանների կողմից ընտրվել է որպես շաբաթվա լավագույն ձայնասկավառակ (ABC ռադիոկայանն Ավտրալիայում, WQXR-ը` ԱՄՆ-ում):

«Գուրջիև» համույթը համերգներով շրջագայել և ելույթներ է ունեցել մի շարք հայտնի սրահներում և միջազգային փառատոններում, եղել է  Լիբանանում, Գերմանիայում, Բրազիլիայում, Արգենտինայում, Իտալիայում, Ռուսաստանում, Շվեյցարիայում, Բելգիայում, Պորտուգալիայում, Հոլանդիայում, Լեհաստանում, Ռումինիայում, Ավստրալիայում և Հայաստանում:

Համույթը նպատակադրվել էԿոմիտասի ծրագրով շարունակել իր համերգային շրջագայությունները աշխարհի տարբեր երկրներում, համերգային սրահներում և ուսումնական հաստատություններում:

Նշենք , որ ECM records ընկերությունը պատրաստվում է հրապարակել նաեւ Կոմիտասի դաշնամուրային ստեղծագործությունները Լուսինե Գրիգրոյանի կատարմամբ 2016 թվականին:

http://www.gurdjieffensemble.com