Թերևս նորություն չի լինի, եթե ասեմ, որ երիտասարդությունը մեծ ուժ է, որ մե՛ր երիտասարդներն են ապագայի հայերը, որ նրա՛նք են վաղվա Հայաստանի կերտողները, և որ սրընթաց ժամանակի նորարարական ծրագրերի մեծ մասն ու վերելքները երիտասարդների ինքնատիպ մտածողության արգասիքն են: Այս ամենի վառ ապացույցը համայն աշխարհով մեկ սփռված տաղանդավոր հայ երիտասարդների հաղթանակներն ու ձեռքբերումներն են տարբեր բնագավառներում, երիտասարդական բազմաբովանդակ կառույցների առկայությունը, նրանց ծավալած հետաքրքիր, հայրենանվեր գործունեությունն իրենց ապրած երկրներում, քաղաքներում: Նրանց հուզող թեմաների շուրջ ծավալված քննարկումների, կարծիքների, առաջարկությունների, նոր, համատեղ ծրագրերի ու համագործակցության լավագույն հարթակը նոյեմբերի 27-ից 29-ը Երևանի Ցեղասպանության թանգարան-ինստիտուտում ՀՀ սփյուռքի նախարարության նախաձեռնությամբ կազմակերպված Հայ երիտասարդների 2-րդ համաժողովն էր: Հետաքրքիր ելույթների, հարցերի, քննարկումների կիզակետում Հայրենիքն էր, նրա առջև ծառացած ռազմավարական խնդիրները և երիտասարդների առաջ քաշած թեզերը: Նրանցից մեկի՝ ԼՂՀ-ի «Հայկի սերունդ» երիտասարդական հասարակական կազմակերպության փոխնախագահ Վլադիմիր Գրիգորյանի հետ էլ ծավալվեցիմ զրույցը:

«Շուրջ 13 տարի է, ինչ գործում է մեր կազմակերպությունը. այն ստեղծվել է 2002թ. նոյեմբերի 6-ին: Հիմնական գործունեությունը դրված է ռազմահայրենասիրական հիմքի վրա: Կազմակերպությանը կից ունենք սկաուտական բաժանմունք: Հայրենասիրական ոգով տոգորված բազմաբնույթ շատ միջոցառումներ ենք իրականացրել թե՛ Արցախում, թե՛ Սփյուռքում, թե՛ Հայաստանում: Կազմակերպությունում ընդգրկված են 12 տարեկանից մինչև 35 տարեկան պատանիներ ու երիտասարդներ՝ Արցախի տարբեր շրջաններից, մայրաքաղաք Ստեփանակերտից:

Վեց տարի է, ինչ ԼՂՀ-ի կառավարության աջակցությամբ և Գիտության, կրթության, Մշակույթի նախարարությունների հետ համատեղ կազմակերպում ենք համահայկական, համաարցախյան ճամբարներ, ուր այս 6 տարիների ընթացքում իրենց մասնակցությունն են բերել 2000 պատանիներ ու երիտասարդներ, որոնց գերակշռող մասը հետագայում անդամակցել է մեր կազմակերպությանը: Հիմնական ակտիվ կորիզը 50 հոգուց է բաղկացած: Քննարկում ենք ծրագրեր և կայացնում ընդհանուր որոշումներ: Միջազգային ասպարեզում ևս մասնակցություն ենք ունեցել. 2013թ. «Երկխոսություն» միջոցառմանը մասնակցեցին «Հայկի սերունդ»-ի երկու ներկայացուցիչ: Այդ միջոցառմանը Լեռնային Ղարաբաղը ներկայացավ որպես առանձին հանրապետություն, առանձին պատվիրակություն: Միջոցառումը կազմակերպվել էր Ռուսաստանի Դաշնության կրթության, գիտության նախարարության և Եվրոմիության կողմից:

Մայիսի 9-ի հաղթանակին նվիրված միջազգային «Вальс победы» միջոցառմանը տարբեր երկրների հետ (Վրաստան, Ռուսաստան, Բելառուս և այլն) ընդգրկված էր նաև Հայաստանը, Լեռնային Ղարաբաղի Հանրապետության երիտասարդ ներկայացուցիչները: Մենք արժանացանք պատվոգրերի, ջերմ ընդունելության, կարողացանք բարձր պահել Արցախի պատիվը:

Մենք ունենք առաջնահերթ երկու խնդիրներ՝ Հայոց ցեղասպանության ճանաչումը և Լեռնային Ղարաբաղի անվտանգությունը, որոնք երկուսն էլ շատ կարևոր են, և այդ երկուսի միջև չափման միավորներ դնելը սխալ կլինի: Մեր կազմակերպության ներկայիս գործունեության հիմքում առաջնահերթ դրված է Լեռնային Ղարաբաղի Հանրապետության ճանաչման գործընթացը: Այս համաժողովը մի ուրույն հարթակ է՝ շփվելու, ձեռք բերելու նոր գործընկերներ, որոնց հետ հետագայում կիրականացնենք տարաբնույթ ծրագրեր, որոնք աջակցություն կբերեն մեզ համար անչափ կարևոր՝ Լեռնային Ղարաբաղի Հանրապետության միջազգային ճանաչմանը»:

Կարինե Ավագյան