Արևմտահայերեն
Русский
EnglishՀայկական բանակը մշտապես ձեռք է բերում սպառազինության ժամանակակից միջոցներ. Սեյրան Օհանյան
Հայաստանի Հանրապետության բանակն մշտապես աշխատում է իր մարտական կարողությունների զարգացման ուղղությամբ:
Այս մասին Հայաստանի պետական տնտեսագիտական համալսարանում ուսանողների հետ հանդիպմանն ասաց ՀՀ պաշտպանության նախարար Սեյրան Օհանյանը՝ պատասխանելով ուսանողներից մեկի հարցին՝ վերջերս հայկական զինուժի կողմից ռուսական «Իսկանդեր» հրթիռային համակարգի ձեռքբերման հավաստիության վերաբերյալ:
«Հայկական բանակը ռազմական, ռազմատեխնիկական համագործակցության շրջանակներում անընդհատ ձեռք է բերում սպառազինության ժամանակակից, ինչպես նաև հեռահար միջոցներ», «Արմենպրես»-ի հաղորդմամբ՝ նշեց նախարարը: Նախարարն ընդգծեց, որ հայկական զինված ուժերի սպառազինության և մարտական կարողությունների զարգացման գործում կարևոր գործոն է գաղտնիության ապահովումը:
«Որքան մենք քիչ խոսենք դրա մասին, այնքան քիչ տեղեկատվություն այդ մասին կունենա մեր հակառակորդը, իսկ մենք ավելի արդյունավետ կկարողանանք իրականացնել մեր գործառույթները», ընդգծեց նախարարը:
Վերջերս Հայաստանը ՌԴ-ից 200 միլիոն դոլարի արտոնյալ վարկ է ստացել, որն ուղղվելու է հայկական զինված ուժերի համար ժամանակակից սպառազինության ձեռքբերմանը: Ռուսական լրատվամիջոցները տեղեկություններ էին տարածել, որ այդ վարկային միջոցներով Հայաստանը ձեռք է բերել ռուսական արտադրության «Իսկանդեր» հրթիռային համակարգ:
