Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի օրհնութեամբ Մայր Աթոռ Սուրբ Էջմիածնի Հրատարակչական բաժինը Գեւորգեան հոգեւոր ճեմարանի «Սերմնացան» մատենաշարի շրջանակներում լոյս է ընծայել Մայր Աթոռ Ս. Էջմիածնի միաբան Գարեգին սարկաւագ Յովսէփեանի (Գարեգին Կաթողիկոս Յովսէփեանց) «Եկեղեցին եւ աղքատների խնամատարութեան գործը» աշխատութիւնը:

Այս աշխատութիւնն իր ուրոյն ու կարեւոր տեղն է զբաղեցնում Գարեգին Յովսէփեանի հարուստ ու բազմաբովանդակ գիտական ժառանգութեան մէջ եւ մեծապէս պայմանաւորուած է 20-րդ դարի սկզբին հայ ժողովրդի առջեւ ծառացած մարտահրաւէրներով: Գարեգին Յովսէփեանն իր այս աշխատանքով նպատակ է հետապնդել ձեւաւորելու այնպիսի մթնոլորտ եւ գաղափարական սկզբունքներ, որոնք թոյլ կը տան  Հայ Եկեղեցուն ակտիւ եւ կազմակերպուած գործունէութիւն իրականացնել սոցիալական ծառայութեան բնագաւառում, ինչպէս նաեւ` յստակ դիրքորոշում որդեգրել ժամանակի սոցիալ-տնտեսական խնդիրների նկատմամբ:

Աշխատութեան մէջ երեւելի եկեղեցականի ուշադրութեան կենտրոնում առաջնահերթ նշանակութիւն են ունեցել հասարակութեան խոցելի խմբերի` աղքատների, որբերի, անչափահասների, մուրացկանների, աշխատազուրկների եւ բարոյական անկման եզրին կանգնած մարդկանց ճակատագրերը: Ոսումնասիրութեան առաջաբանը շարադրուել է Մայր Աթոռի հոգեւոր-կրթական հաստատութիւնների վերատեսուչ, Գեւորգեան հոգեւոր ճեմարանի տեսուչ Տ. Գեւորգ եպիսկոպոս Սարոյեանի կողմից:

  Գիրքը հրատարակուել է մեկենասութեամբ «Սարգիս Գաբրիէլեան» հիմնադրամի եւ նախատեսուած է ընթերցողների լայն շրջանակների համար: