Հունիսի 12-ը Ռուսաստանի օրն է: Այն պետական սիրված տոն է, որը ողջ Ռուսաստանում, ինչպես նաև Տյումենում՝ նշվում է մեծ խանդավառությամբ: Ավանդույթ է դարձել այդ տոնը համատեղել   «Բարեկամության կամուրջ» ազգային մշակույթ-փառատոնի հետ: Տարածաշրջանում ապրում են 150 էթնիկ ազգությունների ներկայացուցիչներ, որոնք հաշտ և խաղաղ աշխատում ու արարում են կողք-կողքի:

Ինչպես «Հայերն այսօր»-ին հայտնում է Ռուզաննա Դանիելյանը, Տյումենի մարզի 23-րդ ազգային մշակույթի «Բարեկամության կամուրջ» փառատոնը բացեց Տյումենի նահանգապետ Վլադիմիր Վլադիմիրի Յակուշևը: Քաղաքային այգին մարդաշատ էր, այստեղ տեղադրված էին քսաներկու տաղավար, ուր այցելեց նահանգապետը:

Հայկական տաղավարը առանձնահատուկ ուշադրության արժանացավ  բոլորի կողմից: Այն շրջապատված էր հոծ բազմությամբ և իրենից ներկայացնում էր Աստծո հրահանգով կառուցված և Արարատ լեռան գագաթին հանգրվանած «Նոյան տապանը»: Աննկարագրելի գեղեցիկ էր հայկական լեռնաշխարհի  գեղեցկուհի  ծիրանենին՝ իր անուշահամ  ու կարմրաթուշ ծիրաններով՝ մարդկության փրկության խորհրդանիշ դարձած Արարատ լեռան լանջին: Այստեղ էին հավաքվել  տյումենաբնակ հայերը՝ Տյումենի մարզի «Հայաստան» հասարակական կազմակերպության խորհրդի անդամները, մշակույթի կենտրոնի սաները, ծնողներ, հյուրեր մոտակա տարածաշրջաններից, ինչպես  նաև տարբեր ազգերի ներկայացուցիչներ:

Բարձրաստիճան հյուրերին մուտքի մոտ աղ ու հացով դիմավորեց «Նոյն» իր ընտանիքով՝ կնոջ և որդիների հետ: Իսկ տաղավարի ներսում  հայկական խոհանոցի բազմաթիվ ուտեստներ, ճաշատեսակներ և Արարատյան դաշտավայրի մրգեր  էին մատուցվում հյուրերին:

Տյումենի մարզի մշակութա-լուսավորչական «Հայաստան» հասարակական կազմակերպության նախագահ Համլետ Փաշայանը Վլադիմիր Յակուշևին  նվիրեց Հովհաննես Այվազովսկու «Նոյն իջնում է Արարատից» նկարի պատճեն, որը նկարել էր մշակույթի կենտրոնի նկարչության ուսուցիչ Ալվանդ Մուրադխանյանը:

Նահանգապետին սպասվում էր նաև այլ անակնկալ՝ հայկական երիտասարդական կազմակերպության անդամները (կոմիտեի նախագահ Ա. Խաչատրյան), փոխանցեցին սպիտակ աղավնի: Նահանգապետն այն բաց թողեց երկինք՝ որպես բարության, խաղաղության և բարեկամության խորհրդանիշ:

Նա ողջունեց ներկաներին,  շնորհավորեց Ռուսաստանի օրվա առթիվ, շնորհակալություն հայտնեց ջերմ ընդունելության համար  և  նշեց, որ  հայկական համայնքը իր համեստ ներդրումն ունի Տյումենի մշակութային և հասարակական կյանքում: Հրաժեշտից առաջ նահանգապետը մեծ սիրով դիտեց «Բերդ» պարը: Տաղավարից նա հեռացավ մեծ  հիացմունքով և գոհունակությամբ:

Տոնակատարությունը շարունակվում էր, ամենուրեք բարձր տրամադրություն էր, հայկական երաժշտություն էր հնչում և բարձր ծափահարությունների ներքո անընդմեջ ոգևորված պարում էին «Հայաստան» և « Նաիրի» հայկական ժողովրդական պարախմբերը (շուրջ  90 հայ աղջիկներ և երիտասարդներ):

Օրվա ավարտին՝ մրցույթի արդյունքները ամփոփելուց հետո, պարզվեց, որ ժյուրին բարձր է գնահատել մեր հայկական տաղավարը և պատվավոր առաջին տեղը շնորհել է Տյումենի մարզի «Հայաստան»  հայկական հասարակական կազմակերպությանը: Բոլորը բարձր խանդավառությամբ շնորհավորում էին միմյանց:

Ամենամյա ավանդական դարձած այս փառատոնը  վկայում է այն մասին, թե որքան բարի-դրացիական հարաբերություններով բազմազգ հասարակություն է ապրում Տյումեն քաղաքում, և երիտասարդ սերունդները բազմազգ միջավայրում դաստիարակվում են բարության, խաղաղասիրության ու հանդուրժողականության ոգով: