Մեր ժողովրդի հերոսական պատմությունը պայքար է անկախության եւ ազատության համար: Այս մասին, սեպտեմբերի 21-ին, Սանկտ Պետերբուրգի Տավրիդյան պալատում ՀՀ անկախության 25-ամյակին նվիրված հոբելյանական միջոցառման ժամանակ իր ելույթում նշել է ՀՀ ԱԺ փոխնախագահ Էդուարդ Շարմազանովը:

ԱԺ-ից  հայտնում են, որ ԱԺ փոխնախագահն իր ելույթում, մասնավորապես նշել է.

«25 տարի առաջ հայ ժողովուրդը կատարեց իր ընտրությունը հօգուտ անկախության: Անկախություն, որի համար պայքարել են մեր սերունդները: Մեր ժողովրդի հերոսական պատմությունը ոչ այլ ինչ է, քան պայքար անկախության եւ ազատության համար: Այդպես էր, երբ Հայկ նահապետը, հաղթելով Բաբելոնի տիրակալ, Հին աշխարհում չարիքի խորհրդանիշ համարվող Բելին, վերահաստատեց անկախ պետականություն ունենալու մեր իրավունքը: Այդպես էր, երբ Տիգրան Մեծը պաշտպանում էր մեր հայրենիքը Պոմպեոսի արշավանքներից: Այդպես էր նաեւ, երբ 451 թվականին Ավարայրում հայերն ապացուցեցին, որ մահն իմացյալ անմահություն է եւ կյանք շնորհեցին գալիք սերունդներին: Ու հենց Ավարայրում հայ ժողովուրդը վերահաստատեց հավատարմությունն իր հոգու երկու հիմնասյուներին` Աստծուն եւ հայրենիքին:

Հարգելի ներկաներ,

անկախության ձգտումը չլքեց մեզ նույնիսկ Ցեղասպանության ժամանակ: Այդ օրերին էր, որ հանճարեղ Թումանյանը խոսեց նոր Հայաստանի մասին: Եվ ինչպես Քրիստոսը ֆիզիկական մահից հետո հարություն առավ երրորդ օրը, այնպես էլ հայ ժողովուրդը, Ցեղասպանությունից 3 տարի անց վերածնունդ ապրելով, Սարդարապատում, Բաշ Ապարանում եւ Ղարաքիլիսայում հերոսաբար հաղթեց թուրքերին՝ վերահաստատելով, որ լույսը ցրում է խավարը: Մայիսյան գոյամարտերում էր, որ թուրք Վեհիբ փաշան ասաց` հայերն ապացուցեցին, որ աշխարհի լավագույն զինվորներն են:

Հենց ազատության եւ անկախության ձգտումն էր, որ 600 հազար հայորդիների ուղղորդեց Հայրենական մեծ պատերազմի ռազմաճակատ: Պաշտպանելով Մոսկվան եւ Ստալինգրադը` նրանք պաշտպանում էին Երեւանն ու Շուշին: Հետագայում Հայրենական մեծ պատերազմի հերոսների զավակներն ու թոռները դարձան հայոց անկախության եւ Արցախյան հերոսամարտի կերտողները: Նրանց պայքարի շնորհիվ է նաեւ, որ այսօր մենք 25-ամյա անկախության կրողներն ենք:

Հավերժ փառք մեր հերոսներին: Կեցցե Հայաստանի Հանրապետությունը, կեցցե Արցախի Հանրապետությունն ու հայ ժողովուրդը:

Շնորհակալություն ուշադրության համար»: