Բուլղարիայի Պազարջիկ քաղաքի նորակառույց Սուրբ Ստեփանոս եկեղեցու բակում խաչքար կտեղադրվի: Խաչքարի հեղինակը երիտասարդ խաչքարագործ Արտակ Համբարձումյանն է, ում աշխատանքները կարելի է հանդիպել ինչպես Հայաստանում, այնպես էլ՝ արտերկրում:

«Խաչքար կերտելու առաջարկը ստացել եմ պլովդիվաբնակ երկու ընկերներ Հարություն Ֆեսչյանի և Արման Սյուլեմեզյանի կողմից: Եկեղեցին կառուցելու ժամանակ նրանք ուխտել են եկեղեցու բակում տեղադրել հայկական խաչքար»,-culture.am-ի փոխանցմամբ՝ նշեց Ա. Համբարձումյանը:

Վարպետը խաչքարը կերտել է մոտ երկու ամսում:

«Խաչքարագործությունը մի ամբողջ դպրոց է:  Դա ինձ ոգեշնչում է, որպեսզի այդ մեծ ժառանգությունը, որը խաչքարագործներիս համար հանդիսանում է նաև դպրոց, պահպանեմ ու շարունակեմ, նորովի մատուցեմ մեր հասարակությանը և մեր ապագա սերնդին»:

Բացի այդ, խաչքարագործը կազմակերպում է վարպետության անվճար դասեր, որի շրջանակներում ներկայացնում է խաչքարի կերտման արվեստը, ծագումը, իմաստաբանությունը և նշանակությունը: