Դեկտեմբերի 23-ին 100 սիրիահայ երեխաներ ամանորյա նվերներ կստանան 100 հայտնի մարդկանցից
Հայոց ցեղասպանության 100-րդ տարելիցին ընդառաջ ՀՀ սփյուռքի նախարարության «Հայերն այսօր» էլեկտրոնային պարբերականի նախաձեռնությամբ և «Սիրիահայերի հիմնախնդիրները համակարգող կենտրոն» հասարակական կազմակերպության համագործակցությամբ իրականացվում է յուրահատուկ ծրագիր` «100 հայտնիները` սիրիահայ 100 երեխաների համար»:
Ծրագրի շրջանակներում Հայաստանի 100 հայտնի մարդիկ, Հայաստանի մարզերում և Երևանի ծայրամասերում բնակություն հաստատած 100 սիրիահայ երեխաների համար «հարյուր» խորհրդանշական թվով ամանորյա նվերներ են պատրաստել:
Նշենք, որ ծրագրի մեջ ընդգրկվել են նաև 18 ուկրաինահայ երեխաների, ովքեր երկրում տիրող անկայուն վիճակից հետո տեղափոխվել են Հայաստան:
«100 հայտնիները` սիրիահայ 100 երեխաների համար» ծրագրի գլխավոր գործընկերը «Ջամբո»ռեստորան-զբոսայգին է: Վերջինիս սեփականատեր Արտյոմ Վարդանյանը դեկտեմբերի 23-ին, ժամը 14:00-ին 100 սիրիահայ երեխաների հյուրընկալելու է «Ջամբո» ռեստորանում, որտեղ նրանց բազմաթիվ անակնկալներ է սպասվում:
Ծրագրի համերգային մասում իրենց կատարումներով հանդես կգան հայտնի երգիչ-երգչուհիներ՝ Զարուհի Բաբայանը, Արսեն Գրիգորյանը (Մրո), Նառան, Անգելինա Գասպարյանը, Բեթթին, Դալիթան և այլք:
Միջոցառման ավարտին սիրիահայ երեխաները կստանան իրենց ամանորյա նվերները:
Ծրագրի շրջանակներում արդեն նվերներ են պատրաստել ավելի քան 80 հայտնի մարդիկ:
Հաշվի առնելով հասարակության մեծ հետաքրքրությունը ծրագրի հանդեպ և երեխաների մեծ թիվը՝ որոշվել է իրականացնել նաև երկրորդ փուլը՝ «Պարգևի’ր ուրախ Ամանոր» խորագրով, որի շրջանակներում ևս 100 սիրիահայ և իրաքահայ երեխաների կհանձնվեն ամանորյա նվերներ: Այս անգամ որպես նվիրատուներ ընդգրկվել են համահայկական և միջազգային կառույցները, հասարակական կազմակերպություններն ու հայաստանյան ձեռնարկությունները, ինչպես նաև անհատ բարերարներ:
Երկրորդ փուլի ամանորյա միջոցառումը կկայանա դեկտեմբերի 24-ին «Փլեյ-Սիթի» զվարճանքների կենտրոնում:
Ծրագրի մեկ փուլն էլ իրականացվելու է Արարատի մարզի Դարբնիկ գյուղում բնակվող սիրիահայ և իրաքահայ ընտանիքների երեխաների համար:
«100 հայտնիները` սիրիահայ 100 երեխաների համար», ինչպես նաև «Պարգևի’ր ուրախ Ամանոր» ծրագրերը ՀՀ սփյուռքի նախարարության հերթական նախաձեռնությունն է` ուղղված Հայաստան-Սփյուռք կապերի ամրապնդմանը: